INTERVISTE. Cirf, il pont cul gnûf diretôr Pascolo

Di Març, l’inzegnîr Paolo Pascolo – che tal Ateneu furlan si ocupe de biomecaniche pe fisiatrie e pe riabilitazion – al è a cjâf dal Cirf, il Centri interdipartimentâl di ricercje su la culture e la lenghe dal Friûl.
Professôr, ce situazion aial cjatât?
Une situazion ferme. Ancje par efiet di un erôr de precedent aministrazion, che e à considerât il Cirf tant che un dai tancj centris de Universitât dal Friûl che a àn chê di racuardâ plui studiôs e dipartiments tor di un teme. Ma chi no stin fevelant di idrauliche o di mecaniche, ma di une lenghe e une culture.
–––
Duncje?
Duncje, dal sigûr il probleme al è pluri-dissiplinâr ma al à dibisugne di une ativitât cetant plui concentrade e puntuâl. L’obietîf nol è dome la ricercje: chê e je deputade ai singui dipartiments. Pluitost, al covente un racuardi di mût che si conservi un patrimoni culturâl che al à lidrîs lontanis e che po al è ancje ator pal mont, pensin tai fogolârs furlans tal forest.
–––
I siei intindiments cuâi sono?
Salvâ lenghe e tradizions, cence sierâju intune scjatule, e tiessi relazions internazionâls par che il Friûl al vedi une visibilitât superiôr: intun moment di globalizazion al è inevitabil, pene il sparî.
–––
Cemût lu organizaraial?
Al è prime di risolvi un probleme gjenerât di cheste interpretazion dal centri no tant precise, limitade e sot-valutade. Tant al è vêr che il Cirf al ven aministrât di un altri dipartiment par une cuistion di deficit di organic. Chest Centri però al varès di vê complete autonomie, oltri che par une motivazion culturâl, ancje par une storiche. Al è fi de Universitât, che e nas de volontât popolâr. O speri di cjatâ la sensibilitât dal guvier academic par che chest aspiet al sedi cjapât in considerazion: par che al gjoldi di une organizazion eficient e di une aministrazion autonome o une organizazion agregade ae ricercje, invezit che a un dipartiment. Insome, une autonomie operative, ancje cun distac di personâl tecnic aministratîf, al sarès ancje un sparagn. Inutil ricuardâ che o sin sot-organic.
–––
E pe lenghe… ce fasarêso?
Il furlan si salve dome se si fevele. E l’ambient academic no lu fevele masse, purtrop, ancje se cheste lenghe e à elements alts, di spessôr. Però o pensi a une azion plui concentrade viers il popul, e je la vite di ogni dì che ti permet di mantignî la lenghe. Duncje o riten che al sedi di tornâ a colegâsi cul tiessût dal teritori, comuns, prolocos. Cence lâ a disturbâ masse, ma lant a tirâ sù ce che al rive dal teritori, sburtâ, cjatâ moments di condivision, par che la lenghe e resti vive e e continui a jessi fevelade. Lavorâ sul teritori vûl dî, par esempli, plui teatris in marilenghe in place e tes sagris. Cheste e je la strade. ❚
Oscar Puntel