Sfuei Mensîl Furlan Indipendent
Archivi de Patrie

In cjargne si siere buteghe e si peste cul massanc

............

A àn tacât cu la ferovie ae fin dai agns ’60, po dopo cu lis preturis, e dopo ancjemò cu lis scuelis professionâls. Fint a rivâ in dì di vuê. Cuant che la manarie e à tacât a pestâ par ben. A partî dai agns Novante si son sieradis lis scuelis elementârs e i asîi (Dogne, Resiute, Liussûl, Preon, Raviei), fint a rivâ ai ultims trê agns con ca ian distudât lis lûs chês di Dimplan di Darte, Rigulât, Ravasclêt. PasSant aes puestis la mignestre no cambie, la sierande si è sbassade a Trave di Lauc, Salin di Paulâr, Soclêf, Tamau di Paluce, ancjemò a Dimplan, Fusinis di Tarvis, cence dismenteâ chê grande part di chei che a son restâts imaculâts, a son stâts obleâts a tegni viert trê dîs par setemane.
Passìn ai traspuarts: dit de ferovie che e rivave un timp fint a Vile, in dì di vuê i trens che a rivin a stazion di Cjargne si podin contâ sui dêts di une man; lis corieris, almancul chês, si difindevin, fin a chest Istât, cuant che ancje li si à tacat a taiâ lis corsis viers i paisuts.
Dit e stradit dal Tribunâl, ancje chei altris uficis di servizi al citadin no son stâts preservâts: la Agjenzie des Jentradis e à smiezât i funzionaris a Tumieç, cussì come a Glemone, vôs a zirin che al sarà cussì ancje pal Inps; la Vuardie di Finance e sta restant a Tumieç dome parcè il sindic al è rivât a sbassâ l’afit; i uficis de Telecom e dal Enel no esistin plui, passât dut ai odeôs Call Center, che cuant che al è di risolvi la emergence, tant che lis neveadis che a àn pleât i traliçs de corint, no si fasint cjatâ.
Se chest al è il public, figurìnsi il privât: planc a planc a àn dit vonde desinis e desinis di negozis, alimentârs, buteghis, artesans.
Lungje la liste, vere? E pensâ che al podarès lâ in piês tai prossims mês… dal rest cu si freial de mont, che e fâs notizie dome cuant che e ven la aluvion… La principâl justificazion che ducj a tirin fûr par taiâ e sierâ e je chel dal spopolament, tai ultins dîs agns si son pierdudis dome in Cjargne trêmil personis.. ma se la int e partìs e sarà une motivazion, se a Tavagna al è plen di Cjargnei ce vuelial dî?
Par fa rivâ la bande largje par internet a àn coventât dîs agns, e no ducj ancjemò le àn, par finî dôs galariis su lis stradis regjonâls, idem. La int in mont e pues restâ a vivi a pat che e veti condizions favorevulis, anzit e sedi incentivade a restâ. No si trate di domandâ “assistenzialisim”, tant che in masse sbaliant in plen, ancje in Cjargne, a àn pretindût di vê. Di tantis bandis dal arc alpin a ‘nd è câs di ripopolaments di paîs, gnovis impresis, turisim che al puarte bêçs. E chi invezit si stâ a barufâ tra cjantons par fruçons di pan. Vonde, par plasê vonde. ❚
✒ David Zanirato

Int di Cjargne / Magjie a Cjarsovalas

Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +

L’Editoriâl / Cuant vignaraie la “adunade” dai furlans?

Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +

Festival di Poesie Alpine / Autôrs di Ladinie, Grisons e Friûl a confront

Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +