INTERVISTE. Censiment 2011, une conclusion positive

O vin tornât a cjatâ Rem Spicemei daspò de conclusion de sô proteste par viodi ricognossût il sô/nestri dirit di podê jessi ricognossus e rispietâts tal nestri jessi e te nestre lenghe.
Rem, il to domandâ di podê fâ il Censiment par furlan, al pâr che al vedi vût un esit positîf. Ce isal sucedût?
Duncje, daspò de mê “obiezion linguistiche”, o soi rivât dibot fint a la fin dal timp che o varès vût par decidimi di fâ chest benedet di Censiment cence scugnî vê rognis. Alore une dì mi à clamât il Segretari dal Comun, che al è ancje il responsabil locâl pal Censiment stes, invidantmi a lâ a fâ une cjacarade cun lui. O soi lât e lui, daspò di une cjacarade, dulà che o ai cirût di dîi lis mês resons, mi à informât che nol podeve spietâ ancjemò plui di tant, che il timp al sarès scjadût, e che po, se no lu fasevi, al scugnive segnalâ il gno non e o sarès stât multât. Cussì mi à mandât cjase cuntune sorte di ultimatum scrit dulà che mi dave 20 zornadis di timp par che mi fos “metût in regule”. I ai pensât par cualchi zornade, parcè che cun dut che i tignivi a fâur rispietâ (a chei de ISTAT) un gno dirit, o savevi ancje che a jerin chei di Rome a vê il curtìs de bande dal mani, ancje se a jerin tal tuart, e a mi no mi smecave masse di lâ a doprâ almancul scuasit un mês de mê pension sclagne par paiâur une multe propit a lôr; che mi pareve tant che un at di autolesionisim a pro di un Stât tibiadôr.
Cussì al è sucedût che, cualchi dì plui tart, il Sindic, cuntune sensibilitât che o ai gust di marcâ, mi à inviât l’invît di là a fâ il Censiment dantmi garanzie che mi varès metût a disposizion trê personis cualificadis, cul mandât di fâmal fâ “par furlan”, come che o podês viodi inte copie di chel invît, che us ai dât. Alore o ai acetât chest “compromès”, e ai 27 di Zenâr o soi lât in Comun a fâ il Censiment.
Riscjâ di paiâ une buine multe par vê un document che al ricognòs, il dirit di esisti (dirit par altri za stabilît di plui leçs) nol podevial jessi un presi masse salât?
Sì, ma soredut inutil. O ai scugnût scombati no pôc dentri vie di mê, ma, intal ultin o soi rivât, come che o disevi parsore, a decidi che, ancje se o ves decidût di paiâ la multe, la sostance des robis no podeve mudâsi: mi varès costât une vore cence menâmi dongje nissun risultât. Che se al fos stât pussibil di viodi cualchi utilitât si varès podût, no cence sacrifici, fâ ancje un debit, ma al sarès stât dut inutil e masochistic, propit parcè che o sarès lât a ingrassâ lis cassis de cuintripart. E alore!?
2021… cemût imagjinistu chel Censiment?
O vin denant di nô la bielece di dîs agns e, ancje se a stan pôc a passâ, o varessin di vê avonde timp par messedâsi, par fâ i pas che a coventin par no cjatâsi ancje in chê volte inte situazion di cumò.
Ciert che bisugnarès tacâ di subit; cjatâsi e dâ dongje un plan di “intervents” intes direzions oportunis, aprofitant ancje di chês fressuris che si son viertis finalmentri a nivel di Comun par lâ fintremai là di chei che si ostinin a no dânus i dirits che propit lôr ju àn stabilîts. Ancjemò une robute: se e fos justizie, no sono lôr che a varessin di sei multâts? ■
Mauro Della Schiava