Il musicist breton al pant la sô solidarietât
ai presonîrs politics catalans
Alan Stivell al è un cjantant e musicist une vore innomenât e preseât. I siei esordis a rimontin fintremai ae fin dai agns Cincuante dal Nûfcent, e di passe mieç secul al è un personaç di ponte tal panorame musicâl internazionâl, in particolâr inte suaze di chê che di almancul trê decenis e ven clamade world music. Tal 1964 al publiche il so prin disc solist, “Telenn Geltiek”, dut strumentâl, tai agns seguitîfs al tache a sunâ une vore ator pe Europe e pal mont, e la sô cariere e la sô funzion di inovadôr de musiche bretone si inviin ad implen a tacâ dai prins agns Setante, cuant che al da fûr un pôcs di discs dulà che, dongje de arpe, si zontin ghitaris e percussions e simpri plui dispès i tescj a son origjinâi e par breton. Un struc di chest percors di art, di ideis e di vite si cjate dentri dal so disc plui resint, che il so titul al è “Human/Kelt”, là che a son lis versions gnovis di une schirie di classics dal so repertori, che pe ocasion a vegnin sunâts e cjantâts adun cun altris musiciscj di ogni dontri.
La jessude dal disc e je stade compagnade di une tournée che e je in plen davuelziment e che vie pal mês di Març e à tocjât ancje il Stât talian. La date plui dongje dal Friûl e je stade chê dai 22 di Març li dal Teatri Corso a Mestre. Ae fin dal conciert, o vin vude la ocasion par fâ une tabaiade, svelte, ma une vore sclete e cordiâl, cun Alan Stivell.
Prin di dut, i vin domandât cemût che e sint la identitât bretone la int de Bretagne, te vite di ogni dì e te produzion artistiche e culturâl. «A son tancj di lôr che a palesin la lôr braùre di jessi bretons – nus à contât – e chest si lu viôt in contescj diferents. Tes mobilitazions politichis e sociâl, par esempli, no mancjin mai bandieris bretonis. Chest nol vâl dome tes manifestazions a pro de lenghe bretone e de sô promozion, o ben a pro dal autoguvier de Bretagne e de riunificazion, sul plan aministratîf, di Naoned/Nantes cun chei altris teritoris de Bretagne storiche, ma ancje tai siopars dai lavorents o ben tes iniziativis dai gilets jaunes, che a son tacadis juste di chês bandis ca. Cun di plui, tancj che a àn pierdût la lenghe, parcè che za i lôr gjenitôrs no le dopravin plui, a tornin a recuperâle e ancje tal cjamp artistic, culturâl e de comunicazion a vegnin fatis robis interessantis e di cualitât par breton, massime intal setôr de musiche».
A proposit di musiche e di lenghis, dentri di “Human/Kelt” si cjate une gnove version di “Ideas”, che il so test, dongje dai viers par breton, par francês e par ocitan, si insiore di parts par cors e par catalan, e si presente ancje cul titul par catalan “Com una gran orquestra”. Isal une sorte di manifest artistic e politic? «Za te sô version origjinâl, la cjançon e veve chê di marcâ la impuartance de diversitât linguistiche e la solidarietât jenfri des comunitâts minorizadis dal Stât francês. La zonte di parts par catalan e par cors e conferme chel intindiment. Al è impuartant dâsi dongje par fâ indenant chês rivendicazions comunis di identitât e di dirits di fonde. Vie par chescj agns si son infuartîts i rapuarts jenfri diviersis entitâts culturâls e politichis bretonis, ocitanis e corsis. In chest moment la Corsiche, di chest pont di viste, e je la realtât plui fuarte e plui dinamiche».
Stant che un altri musicist di innomine planetarie tant che Peter Gabriel al veve palesade la sô solidarietât pai presonîrs politics catalans e la sô opinion a pro dal dirit di decidi, i vin domandât ancje a Alan Stivell ce che al pense de cuistion. «Mi vegnin i sgrisui a pensâ che inte Europe democratiche dal dì di vuê a sedin presonîrs politics – nus à rispuindût -. O pensi che al sedi just che la int e palesi la sô volontât e che e decidi dal so avignî. Al varès di jessi alc di normâl». ❚
Marco Stolfo
