Intensitât e emozion cul cuartet des ANUTIS, te cjantade in memorie di Pier Paolo Pasolini

A àn viert il concierton di Suns Europe 2023, fasint vignî i sgrisui cu la intensitât e cu lis vibrazions des lôr vôs metudis adun.
Il cuartet ANUTIS nus conte di cemût che, unichis in Italie, a àn vût il plasê di dâ vôs al progjet musicâl di une des plui grandis compositoris talianis: Giovanna Marini.
◆ Pe prime volte sui palcs e rive cussì la musiche di une compositore femine, interpretade di cuatri vôs zovinis e cuintri corint, intun progjet dedicât a un dai plui grancj artiscj e pensadôrs libars dal Nûfcent, o ben Pier Paolo Pasolini.
Il cûr nol à mai vût tante dificoltât intal esprimi e intal contâ come in cheste epoche. Cussì, cuatri zovinis artistis a trasformin cu la lôr vôs chestis domandis e torments mai tant atuâi, miscliçant musiche popolâr e culte.
◆ La lôr ricercje vocâl e vûl cjatâ lis diviersis formis musicâls partint di un sun unic, fasintnus tornâ ae realtât di un passât che nol è po cussì lontan. Par fâ chest, a doprin lis lôr vôs, passant de musiche classiche, jazz, al fado, ae cjançon napoletane, fin ae improvisazion libare e ae musiche antighe.
◆ Il grup ANUTIS al è une farie di esperiencis e di struments ecletichis che al nas di une idee di Laura Giavon tal Setembar dal 2022, metint dongje un cuartet pardabon eterogjeni.
◆ Laura Giavon e Juliana Azevedo si cognossevin za par ve studiât insiemi tal conservatori di Amsterdam, ma cun Alba Nacinovich e Caterina De Biaggio e jere la prime volte che si incrosavin parcè che a rivavin di esperiencis diviersis; ma, come che a contin, «si sin cjatadis sot l’aspiet uman, e o condividìn la stesse vision dal mont e de musiche».
Giavon si è formade tal ambient de improvisazion, cence ve pôre di lâ fûr dai schemis dal jazz moderni, cjapant dentri cussì contaminazions rock, pop e il cjantautorât. Ancjetant par Nacinovich, cjantante flumane che e à al atîf diviersis colaborazions ancje in Friûl, la plui impuartante chê cul pianist Glauco Venier.
◆ Invezit, De Biaggio e je diplomade in piano, e à une grande esperience corâl e e je ative sul teritori furlan. Azevedo, infin, e ven dal mont liric e e fâs tante ricercje te musiche popolâr portughese, brasiliane e taliane.
Lis artistis a fasin dutis part di diviersis progjets, grups, teatris e côrs no dome in Friûl, e in Italie, ma ancje pal mont: de Cravuazie, passant pe Olande, al Portugal.
◆ Graciis al supuart di Cristiano Dell’Oste (Côr dal Friûl-Vignesie Julie) il cuartet al à vût la pussibilitât di passâ dîs dîs a Rome te cjase di Giovanna Marini, lavorant cu la compositore stesse su lis oparis ispiradis a Pasolini, cirint di rangjâ lis musichis aes vôs dal gnûf cuartet a pene metût insiemi.
Cu la Marini a àn lavorât a cjants par furlan e par talian, partint des musichis che la artiste e scrivè pal spetacul de edizion dal 1996 di “I Turcs tal Friûl”.
◆ Da “I Turcs tal Friûl” al ven ancje il non di chest cuartet. Come che a contin: «te opare teatrâl si cjate une femine une vore impuartante, Anuta Perlina, che e je une specie di oracul dal Pais, che pûr savint cemût che al è fat il mont, istès e continue a vê sperance. E duncje, in onôr di Anuta Perlina, o vin decidût di clamâsi ANUTIS».
◆ Tal spetacul “MEMORIA. Cantata a Pier Paolo Pasolini”, che al à za fat il zîr dal Friûl chest Istât e che al continue cun apontaments ancje a Rome, lis ANUTIS a puartin in sene lis musichis di Marini e Paola Nicolazzi, cui tescj che a son chei origjinâi di Pasolini. Insiemi cul cjant a metin in sene une vere dramatizazion, con gjestualitât leade al vaî ai funerâi, tipic di tantis areis dal meridion di Italie. A metin insiemi in maniere magjistrâl une fuarce che si lee al test, aes armoniis che a vegnin fatis dome cu lis cuardis vocâls, dant une intensitât e grande emozion ae esibizion.
◆ Un altri spetacul che a puartin in sene al è “Al sacri popolâr”, conciert che al propon cjançons sacris dal 1200 ai 1900. A àn ancje partecipât e bienâl di architeture di Vignesie intune instalazion sonore che e à il titul “Sot glas”, une colaborazion cul artist sonôr Renato Rinaldi e cul doi di instaladoris Ana Shametaj e Guditta Vendrame.
◆ Par ce che al tocje i progjets e lis colaborazions futuris no nus puedin ancjemò pandi lis novitâts, e par chest ancjemò di plui staitjur daûr sui lôr profîi social cirint @anutis.quartet o scrivêt a anutis.quartet@gmail.com ❚