Vilma Montenuovo e je nassude a Cjanive di Tumieç ai 22 di Mai dal 1919. Chest an e à finît 102 agns, ma la memorie e je inmò vive. E conte: “Rivâ a cheste etât al vûl dî che si ‘nd à passadis avonde. Cuant che o soi nassude, gno pari al jere za muart in vuere: al jerestât ferît, e lu àn puartât tal ospedâl a Perugia indulà che e jere lade jù ancje mê mari. Dopo e je tornade sù achì e e à cjatât dut rot par vie de vuere (e veve za 4 fruts piçui). Dopo si è podude sistemâ intune barache che a vevin fat sù di corse e che no tignive trop il frêt. O fasevin la cole cu la farine blancje, le metevin tes breis e o tacavin sù i gjornâi par che a tignissin un pôc il frêt… Joi ce tant frêt che o vin patît! O sin stâts li par agns, fin che a àn tacât a sistemâ la cjase. O sin cressûts cun tante miserie, tante polente e pôc formadi (cuasi mai il pan, parcè che al costave) e tante mignestre di fasûi. Mê mari e veve un tic di campagne e biel planc e à rivât a vê une vacje. Nô fruts o sin lâts a scuele: gno fradi grant al veve fat la seste, un al è lât in coleç a Udin. Jo o levi a scuele a Tumieç, cui çucui e cuntune manteline sore vie, fin a misdì; po si tornave aes dôs par continuâ lis lezions. Ca e là di Tumieç simpri a pît. Jo o ai fat la cuinte: mê mari e jere vecje e no rivave a stâ daûr ae campagne, e cussì o ai scugnût judâle cun pale e ristiel… No come cumò che no fasin fadie a lavorâ la tiere!
◆ A 17 agns o ai cjatât il morôs (lui al veve 21 agns e al jere di Cjanive). Dopo un pôcs di agns si sin maridâts. Pe ocasion, mê mari e à fat une torte miôr che e podeve: mancul robe si meteve dentri e miôr al jere! Al è vignût sù gno fradi che al jere a Udin: al à puartât la cjocolate che e je stade dade fûr insiemi cuntun piçul tucut di torte. Chê e je stade la mê fieste! Dopo, il gno om al è lât soldât: al à fat siet agns di militâr e tal ultin al è stât presonîr in Gjermanie doi agns… une fortune che ti dîs jo! O vin vût doi fruts: Gianpietro e Loris. Pense che il gno secont fi al à viodût so pari pe prime volte cuant che al veve 2 agns!”
Ricuarts no biei chei de vuere, ancje par Vilma: “O jeri scjampade e lade sù cun gno fi piçul a Vile, li di une agne. La vacje le vevin dade a passi a Divilin e ogni dì o vignivi jù di Vile a cjoli il lat di dâ di mangjâ a mê madone e a gno fi. Dopo, mê cugnade mi à visade di tornâ a cjase parcè che a stavin rivant i rus che a fasevin saltâ i puints. Rivade a Cjanive, o sin lâts a durmî in tancj in canoniche. Cuant che Diu al à volût, o sin tornâts a cjase. O ai bruts ricuarts dai cosacs… a àn puartât vie dut a la int. Dopo al è tornât il gno om e al à scomençât a lavorâ a Milan a fâ l’autist; jo o soi stade vie cun lui 5 agns. La miserie le vevi simpri intor, no podevi spindi. Cuant che o sin tornâts, o vin pensât di fâ sù une cjasute. O vevi 60 agns cuant che il gno om al à scomençât a no stâ ben e al è muart, e jo o soi restade come une ocje.”
◆ Cuant che a Vilma si domandii se al è un truc par rivâ a cheste etât, jê e rispuint: “Nol è nissun segret. Jo o soi lade indevant simpri cussì e no ai fat nuie par deventâ tant vecje… Mi diseve simpri il gno om ‘no tu mûrs tu ve, femine!’: lui al veve simpri alc, e jo no. A mi no mi dûl nuie, si viôt che no je inmò ore che o muri! Mi son muartis dutis lis amiis e no ai nissun vecjo di condividi cun lui i ricuarts.”
◆ Sul mont di vuê, Vilma no à un grant traspuart, anzit e pense che “A son ducj esigjents e no son mai contents. A àn cussì e a vuelin culà. No àn nissun timôr di Diu, no van a messe, no crodin in nuie. O vin di vê ducj un pari come che lu vin sù pe tiere.”
◆ Vilma e à simpri vût une grande passion, chê dal cjantâ. E dîs “O sai tancj cjants. Cuant che o levi in glesie ju davi sù, o vevi une biele vôs”. E, stiçade a cjantâ, e da sù “lis cisilis nus bandonin e il cucuc nol cjante pi… ma l’amôr in me al aumente pe me biele prin di partî. Ma al è tant il ben che i vuei…”
I voi di Vilma a cjapin vite cun cuissà trops ricuarts e a slusin di contentece. ❚
Apontament / Presentazion dal libri “Patriarcjis tal cûr de Europe” e dal mensîl “La Patrie dal Friûl”
Redazion
Presentazion dal libri “Patriarcjis tal cûr de Europe” di Diego Navarria e dal mensîl “La Patrie dal Friûl”, l’unic dut in lenghe furlane dal 1946. Ai 26 di Zenâr aes sîs sot sere (18.00) te Biblioteche comunâl di Reane dal Roiâl, vie Battaglione Julio 7 – Remugnan. A saran presints: Anna Zossi, Assessore ae Culture […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +
Int di Cjargne / “La gallinella saggia” che a Cjavaç e insegne a produsi e a mangjâ ben
Marta Vezzi
La aziende agricule biologjiche La Gallinella Saggia e je nassude 7-8 agns indaûr: “La idee e je stade di mê mari – e conte Caterina Pillinini – che e à simpri fat orts e cjamps, e duncje e je une vite che si dediche ae coltivazions di tancj prodots; vint il ristorant Borgo Poscolle e […] lei di plui +
Sport… che ti trai! / Pietro Corredig e Sonia Borghese: une vite di pignatis a scufiots
servizis di Francesco Tonizzo
La cubie dai cjanalots, un di San Pieri e une di Miers, e à vinçût il campionât talian di machinis storichis e il titul european, simpri cun Sanremo intal destin Inzen, passion, amôr, dedizion, voie di zirâ il mont, spirt competitîf, leam cun il teritori des Vals dal Nadison, e risultâts une vore preseâts. Il […] lei di plui +
L’EDITORIÂL / La identitât e ven dai zovins
Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +