A ‘nd è inmò zovins in Cjargne cu la passion pai animâi e pe nature e che, cun tante voie di fâ, a àn inviât e metût in pîts ativitâts agriculis. Un esempli e je la aziende dai zovins zimui Roberto e Michele Pace di Preon. La lôr passion e je nassude cuant che a jerin inmò fruts: lôr nono Pieri al jere di Clavaiis e al faseve il fedâr. Cuant che a àn finît 11 agns a àn volût fâsi regalâ di lôr mari une cjavre parom, ancje se po in realtât a cjase a ’nt son rivadis ben 3!
La lôr aziende – Fratelli Pace sas – e nas tal 2018, cuant che a finissin 18 agns. A àn cjapât part e a àn vinçût il bant pe assegnazion da stale a Preon – di proprietât de UTI de Cjargne – e de Malghe Palis, e cussì a àn tacade la lôr aventure; a fasevin inmò la scuele di Agrarie e intal stes timp a lavoravin.
◆ Vuê a àn cirche 115 cjavris e in chest ultin periodi a son nassûts, pôc su pôc jù, 100 zoculuts.
◆ “O vin soredut la raze Cjamoçade des Alps, e di doi agns incà ancje la Frise che e je plui robuste par lâ sot dai crets – al dîs Roberto. – I prodots di cjavre a son plui digjeribii: o fasìn formadielis frescjis e stagjonadis e ancje speziadis, scuete frescje e fumade, jogurt di bevi e tal vasut, çuç, formadi cremôs, strachin. La cjar si tramude in salams, würstel e salums.”
◆ La produzion e je dute biologjiche e chest, par Roberto e Michele, al domande un grum di lavôr in plui, cence contâ la burocrazie di stâi daûr! Di fat, al dîs Roberto, “Par vê il prodot bio o vin dut un regolament di seguî, nus cambiin dutis lis tempistichis (par fâ il prodot tu stâs il dopli dal timp), tancj regjistris e cjartis di compilâ. Tai cjamps o vin di fâ la rotazion dai prodots, des semencis e vie indenant.”
◆ Cuant che si domandi a Roberto di contâ ce che al fâs intune zornade, al tache disint “O jevi adore par lâ a molzi: cumò o vin i cjavrets che nus impegnin di plui; dopomisdì o fasìn il formadi e po o vin tant di chel cefâ che e ven subit ore, la sere, di tornâ a molzi. E jenfri vie, tocje ancje cjatâ il timp par lâ dal comercialist!”
◆ Il prodot al rive tai marcjâts graciis a lôr mari: lunis a Tumieç, miercus e vinars a Triest, sabide a Tarcint; tal timp, i fradis a varessin intenzion di vierzi un spaç dongje de stale.
◆ “La cjavre e je fate par stâ difûr il plui pussibil – al dîs Roberto –. Achì a Preon o passìn cirche 6 mês ad an e chei altris sîs in Malghe Palis; là sù lis cjavris a stan benon, al è il lôr mont! Se tu âs voie di vê bielis bestiis, ti tocje puartâlis in mont: no je la lôr nature stâ inte stale.”
◆ Dongje di cheste ativitât principâl, i fradis Pace a vendin lens di brusâ e a coltivin cjamps cun verduris biologjichis di lôr produzion.
◆ E a proposit di progjets pal doman, Roberto al dîs “Nus plasarès vierzi une fatorie didatiche e sociâl; o sin daûr a lavorâ su chest e o podìn dî che il progjet al è prossim ae realizazion. Lavorâ in mont al à lis sôs dificoltâts che o i cirìn di superâ. Cuant che al plûf fuart la strade si ruvine, lis busis si slargjin e nus tocje proviodi a nô di meti subit in sest. Se o molìn ancje nô, nol reste plui nissun! Za o sin in pôcs che o fasìn chest mistîr…”
◆ A Roberto e Michele la passion no ur mancje e la voie di fâ nancje; par savê alc di plui, al baste lâ a Preon o dâ un cuc al sît http://fratellipace.weebly.com/ ❚
