Franceschino Barazzutti. Une vite dedicade ae difese dal teritori

Franceschino Barazzutti (ex sindic di Cjavaç, ex conseîr regjonâl, ex president dal BIM Tiliment, President onorari de Associazion dai sindics de ricostruzion dal taramot) al è un grum atent ai problemis da Cjargne, di fat al è part ative tai diviers comitâts, in particolâr (ma no dome) in chel de protezion dal lât di Cjavaç che lu viôt simpri presint in prime linie a difese dal teritori.
◆ «La Cjargne e je la mê tiere – al conte – indulà che o soi nassût, indulà che o ai vivût. Inizialmentri o ai studiât a Tumieç mediis e liceu, a Triest 3 agns di universitât, altris 4 agns te universitât di Mosche e po o soi tornât. I miei interès a son achì: o partìs dal principi che jo o sint il gno teritori; il gno caratar mi sburte a interessâmi di chei che a son i problemis, a presentâ propuestis, a no jessi indiferent! Parcè che o ai cjapât a bracecuel un principi: la indiference e je un brut mâl!»
◆ «La Cjargne di îr le ai vivude di un pont di viste sedi politic che aministratîf: la int e jere preparade, ancje par vie di une disgracie che e jere la emigrazion. Cuant che la int e leve fûr a lavorâ, si cjalave ator e e viodeve cemût che e jere la vite di altris bandis, cemût che a guviernavin, cemût che e jere la culture: cuant che a  tornavin a puartavin achì lis ideis. O ai simpri presint chei vecjos cuant che a levin a lavorâ tal imperi austroongjarês, in Gjermanie, in Austrie: in chel periodi li, lis ideis a difese dai operaris a jerin vivis in chei paîs e, puartadis achì, a son nassudis lis latariis sociâls, lis societâts cooperativis, lis mutuis societâts… E jere miserie, ma la int e jere ative e si organizave! E curave il so teritori e i jere leade.
◆ Une grande part dal merit de cure dal teritori si à di ricognossile aes feminis di chê volte che – intant che i oms a jerin fûr a lavorâ pal mont e che a mandavin i bêçs par mantignî lis fameis – a curavin prâts, cjase, ort e dut cuant. Forsit, e cence invocâ la miserie parcè che no fâs ben a di nissun, o vin di recuperâ chel spirt li. Cuant che o soi tornât di Mosche mi soi metût in politiche, o soi finît sindic a Cjavaç. O soi stât impegnât 25 agns tra conseîr e sindic. O ai finît tai agns dal taramot: une prove gjenerâl par dute la classe aministrative e politiche, e disìn pûr che le vin superade ben! Dopo fate ben la ricostruzion, al è començât il periodi de decjadence, forsit par vie de strachece».
◆ Su la Cjargne di vuê, Franceschino al tire fûr i pugns e cu la sô grinte al dîs: «O soi demoralizât. Mi cjali ator e no cjati interès. Jo no viôt une difusion di culture e la politiche no je! I partîts a son finîts, lis associazions a àn dificoltâts e a son interessadis un grum al balon e a fâ dome sagris, ma no viodin di fâ culture… O viôt une grande decjadence. In diviers comuns, cuant che a son lis elezions, a fasin fature a meti sù un uniche liste, figurâsi! Mi fasarès plasê che a fossin opinions diviersis su la interpretazion di dâ ae realtât: dal confront e ven fûr la soluzion miôr. Ce che mi fâs vaî vuê: tantis cjasis che son cui scûrs simpri sierâts. O vin ricostruît ben ma dopo a son lis cjasis lassadis li, o a son popoladis di vecjos, o a son vueidis dal dut. O pensi a ce patrimoni che o podaressin sfrutâ (ve che o torni ae mê passion, che e je chê dal lât che al tornàs biel, net e cjalt come che al jere une volte), a trops tancj bed and breakfast che a podaressin vivi. Invezit al è dut bandonât! Alore o vin di dâsi lis mans intor. Nol è pussibil che ogni ploiade o ogni neveade la Cjargne e resti cence corint. Cun dutis lis centralinis che a son ator… parcè che le cjapin e le puartin jù in planure!
◆ Mi auguri che la costituzion de comunitât montane e vedi podês, e che li dentri e jentri int di sest che si messedi e che e vedi inteligjence, e che si meti a disposizion cun fuarce par risolvi i problemis de Cjargne e de mont. Mi auguri che al sedi cussì!
◆ I zovins cjargnei a son ducj che a studiin cumò. O ai let che i zovins aministradôrs comunâi a àn fat une associazion (e o soi un grum content), baste però che si messedin a fâ assembleis ator pai comuns, spiegant a la int. Putrop il Covid nol favorìs chest ma scrivi a puedin! E covente int gnove parcè che in nature e je une leç che i vueits no restin vueits e a vegnin jemplâts: se tu i prâts no tu ju curis, a vegnin ocupâts de vegjetazion; compagn te societât: i vueits democratics a vegnin prin o dopo jemplâts parcè che i oms si son simpri spostâts. Alore tocje che si detin da fâ.” ❚