Come ogni an la fieste dai 3 di Avrîl e je la fieste de Patrie dal Friûl e dai Furlans. Par celebrâ e resonâ su chest impuartant simbul de nestre identitât za di agns, pre Antoni al scriveve su chestis pagjinis e noaltris, ancje dopo che nus à lassât, puntualmentri o vin riproponût lis sôs riflessions su cheste date, analisis e resonaments simpri atuâls e che ancje chest mês us proponìn a pagjine 12.
Cheste volte o jerin daûr a preparâ une pagjine dedicade in plui, in maniere di furnî no dome il calendari dai apontaments (cjalait il program chi in bande), ma ancje une riflession di zontâ al Ferâl di pre Antoni, cuant che nus è rivade cheste letare che o publichìn. Lu fasìn vulintîr parcè che nus è someade la maniere plui juste e vive par celebrâ cheste date, che simpri di plui e je sintude de int deventant simpri plui popolâr. E o pensìn che chest segnâl al onori ducj chei che fin des primis edizions si cjatavin a Aquilee par celebrâ chest inovâl, ancje a cost di jessi in pôcs, chê volte, e magari ancje sbeleâts.
E le publichìn ancje parcè che nus somee un segnâl di chel malstâ che al zire ator pal Friûl di chei, e a son tancj, che si domandin e a domandin a chei altris, ce che o vin di fâ tal concret.
Buine fieste de Patrie dal Friûl a ducj!
Cjârs, purtrop no pues jessi a chest incuintri [la presentazion di Eutanasie di un Patriarcjât a Vençon ai 19 di Fevrâr dal 2012, ndr] cuntun teme une vorone impuartant (o ai la prime edizion cu la dediche di pre Antoni). A ce che al à scrit nol è nuie di zontâ se no che chest librut nol varès di mancjâ te librarie dai Furlans parcè che se mai al fos dibisugne, nus da la idee di cetant onôr e, ven a stâi, di cetante responsabilitât che o vin di vê a jessi fîs dal Patriarcjât di Aquilee.
L’onôr al nas de impuartance che al à vude te storie nestre, de Glesie e de Europe; la responsabilitât e nas de cussience che la Sô storie nus clame a no dispierdi chescj valôrs, ma anzit a fâ di dut, cuintri di dut, par che a vegnin sparniçâts.
Par no dispierdiju lis istituzions e soredut lis associazions sul teritori no bastin plui ma, ce che al è plui problematic e je la mancjance prospetiche, ancjemò jê, de partitiche interessade dome ai siei interès che no àn nuie a ce fâ cu la dibisugne de Nestre int a scomençâ dai moviments autonomistics o miôr al sarès clamâju pseudoautonomistics, che rivâts in dì di vuê no son rivâts a puartâ dongje se no i rescj dai rescj di chei altris. O vin di scomençâ a pensâ daurman a un Comitât Referendari (Provincie Autonome Furlane e Triest Citât Metropolitane) ancje pal fat che ce che si môf a rivuart tes stanziis dal podê, al puce.
Lu ai za scrit e lu torni a berlâ cun dut il significât che chest al rapresente soredut par Chei che prime di nô lu àn predicjât: o vin di rivâ a dâi al nestri friûl chê autonomie istituzionâl che e rapresente la bataie des bataiis: cence “se” e cence “ma”. Il prossin 3 di Avrîl che al sedi dedicât a chest argoment. ■
Mandi di Renato Placereani, Udin
Redazion