IMPRESE. Dal benstâ al ven il disvilup

«La nestre economie no pues cressi cence che la nestre int e stedi ben». Chest principi nol è scontât: Bravo lu riten anzit fondamentâl, soredut devant a un dibatit sul mont dal lavôr che al somee meti  cuintri impresaris e lavoratôrs. «No si va di nissune bande cence coesion sociâl» al dîs «e i plans di disvilup a àn di jessi simpri compatibii cu lis realtâts locâls e cu la tutele dal ambient. La robe che e covente di plui par produsi e vendi ben e je il benstâ di ducj, dal paron de imprese e dal operari che al lavore par lui». Cemût si fasial dut câs a sigurâ coesion sociâl intune epoche di precarizazion che e cres simpri di plui, soredut pai zovins? «No si pues plui nancje impensâsi di vê un puest fis, ma cheste e je une sfide pai nestris zovins. Scometi suntune formazion poliedriche e soredut su lis lenghis al è necessari par mudâ cheste condizion intun vantaç. I nestris vons no savevin ce che al jere il puest fìs, ma a son lâts indevant distès».
DEFISCALIZAZION E CREDIT PE IMPRES_ E la piçule e medie imprese furlane e scugnarà fâ sisteme, ma e va judade cun defiscalizazion dai investiments e ancje il sisteme dal credit al à di molâ i cordons de borse, fasint jessi une licuiditât che fin cumò no je stade destinade avonde a fâ cressi la nestre economie. «Partecipadis e ents strumentâi de Regjon no van sierâts, ma governâts e razionalizâts. E la strade de gjestion finanziarie globâl di bande de Regjon che al veve sielt Illy e larès cjapade di gnûf in man, dome fasint partecipâ il mont imprenditoriâl e cence imponi nuie dal alt come che invezit al è stât fat in chê volte».
MODEL LINUSSIO_ Cussì Bravo al stime che i furlans a continuaran a fâ ce che a àn simpri fat; produzions impuartantis e inovativis. Lant daûr a modei di imprenditôrs che no son dome i Snaidero, Melzi, Fantoni, Pittini e Danieli, ma cjalant a un model che al va ancjemò plui indaûr, a Jacopo Linussio. «Al à inventât lui robis come il spionaç industriâl o lis sponsorizazions. Pe sô industrie al veve une rêt di spiis che a levin ator a robâ ideis in Austrie e in Gjermanie. E cuant che al paiave i pitôrs al domandave che a metessin il so non sul cuadri: no par vanitât, ma par publicitât».
MADE IN FRIÛL_ In curt, la ricete di Bravo e je simpri chê che al veve studiât trente agns indaûr; pontâ sul “Made in Friuli” «che nol è fat dome di un grum di prodots unics e di cualitât, ma dal valôr di garanzie e di afidabilitât che la int furlane ur met dongje». Un soreplui che al è decisîf par cui che al compre: «parcè che se tu âs di cjoli alc par spindi pôc no tu vignarâs mai in Friûl. Se tu vegnis culì al è par sielzi robe fate ben, che e dure a lunc o che no à nuie di compagn par bielece o savôr. Chei che a van a comprâ prodots furlans, in sumis, a vuelin puartâsi vie ancje une part di nô».
FURLANS FEVELAIT FURLAN_Par sotliniâ cheste fuarte specificitât «o vevi sburtât sul claim “Furlans, Fevelait Furlan!” parcè che une clâf par sburtâ i zovins a crodi tal avignî e sta intal rinfuarçâ la culture e lis lidrîs, la cussience di jessi int che e vâl, che e ven di lontan e che e pues lâ lontan». No par delocalizâ o par emigrâ, ma par puartâ ator pal mont cualchi toc di Friûl che al fasi vivi miôr cui che lu compre: e magari par imparâ a rindi simpri miôr e plui competitive la produzion de Patrie. ■
Walter Tomada