CJARGNE. Progjet Gjine

Sabide ai 18 di Fevrâr, inte zornade che Gjine Marpillero e varès finît 100 agns, il Comun di Darte e la associazion culturâl “Amîs di Darte” a àn presentât, inte storiche sale dal Savoia, il “Progetto Gina”: une maniere par mantignî vive la figure di cheste femine scritore nassude a Darte, che e à scomençât a scrivi a la etât di 68 agns. Il so prin libri – “Essere di paese” – al à vût un bon sucès e tancj ricognossiments. Intal timp si è fate cognossi in dut il Friûl, soredut pe sô semplicitât di scriture e pe sô vitalitât intal contâ storiis di une volte.
E propit cun chest spirt, i fruts des elementârs e des mediis di Darte a àn disniçade la zornade dant une cerce, ai tancj presints, di chê che e jere la Gjine poete, interpretant e cjantant une sielte des sôs poesiis.
Il professôr Mario Turello, invezit, si è fermât su pe figure de Gjine scritore, presentant la opare inedite “Le mie cento passioni”, dulà che e salte fûr une femine plene di passions e di voie di vivi.
L’intervent de gjornaliste Costanza Lunardi, al à discuviert la Gjine di ogni dì: une persone atente a ce che al sucêt dongje di se, ative intes tantis ativitâts di passetimp, pronte a vierzi la sô cjase ai amîs e cun tantis sorpresis par ducj.
La aministrazion comunâl, pe ocasion e à screât il “Progetto Gina”: il prin pas al è za stât fat inviant il lunc iter burocratic par intitulâ il ples scolastic di Darte ae scritore. Un altri pas al sarà la realizazion, cheste Istât, di un spetacul su pe vite di Gjine cu la colaborazion di Fabiano Fantini, Maria Luisa Rosso e Sebastiano Zorza. Altre iniziative, in zonte, al è il premi “Gjine Marpillero”: i fîs Caterina e Fabiano a àn pensât di dâi vite a un ricognossiment riservât aes feminis de Cjargne che si son metudis in lûs in ambient artistic pes lôr passions (une jurie e stazarà lis propuestis).
Grant finâl de zornade cun Gigi Maieron e la sô bande che a àn savût riproponi cun test e buine musiche il spirt de scritore (in particolâr cu ‘La cidule’, su test de poetesse), un spirt che al continuarà a vivi ancje cu lis prossimis iniziativis che il comun di Darte al puartarà indevant. ■
Marta Vezzi