Sfuei Mensîl Furlan Indipendent
Archivi de Patrie

INCHIESTE: R/ESISTI IN MONT. Intun sens di comunitât ricjatât, la clâf par un svilup pussibil

............

Inviât in Cjargne un percors
di partecipazion dulà che diviers
atôrs sociâi a cirin di cjapâ sù
il caric dal destin di un teritori

Passe un an indaûr, intal Lui dal 2017, la Anpi de Val de Bût e veve inmaneade une buinore di lavôr sul disvilup locâl de Cjargne, sperimentant un percors di partecipazion indulà che i diviers atôrs sociâi a podessin tentâ di cjapâ sù il caric dal destin di un teritori e, zuiant un tic cu lis peraulis, movisi intor dal concet di “r/esisti”, intindût tant che maniere, strategjie, progjet pal vivi e pal lavorâ in mont.
Partint dal titul “Tiessidôrs di Comunitât – ricognossisi artesans de coesion sociâl”, si cirive di cjapâ di gnûf in man i fîi dal telâr dulà che un an prime l’inteletuâl cjargnel Leo Zanier e altris ospits a vevin tacât a filâ e a cjalâ indenant dopo de crisi cetant grave di Coopca, tocjant, prime di dut, il concet di cussience che la int che e vîf intun teritori e varès di vê di se stesse.
Judâts di une idee di Miriam Totis (che intal 2017 e coordenave ancjemò il Servizi sociâl dai Comuns de Cjargne), i partecipants a vevin di meti adun un cuadri de realtât sociâl, “un araç”, che al podès jessi presentât a la int intai mês dal Autun, par rivâ, intal Lui di chest an, a capî trope strade che si varès rivât a fâ movintsi ducj insiemi: un lavôr dificil, considerant la vocazion dai cjargnei a cori ognidun par so cont.
Di chê buinore a Paluce alc al è saltât fûr, metint dongje i pinsîrs che al someave che a coressin ator dibant – propit come i cjargnei! – e, tacant dai problemis e des soluzions, si à podût ricognossi i trois di dulà che si podeve (tornâ a) partî.
Inte tabele che o viodês publicade a man drete, no si cjatin riferiments a infrastruturis e puescj di lavôr, ma sclesis di une Comunitât, ven a stâi di ce che al reste (e nol è un probleme dome de Cjargne e de mont) des relazions che un timp no masse lontan a jerin part di une tiessidure coerente, dulà che un teritori, a man a man bandonât, si tignive dongje curant se stes, insegnant ai zovins i mistîrs che a coventavin a mantignîlu e a valorizâ lis risorsis che al veve (e che al podarès vê ancjemò).
Il lavôr di Paluce nus furnìs un cuadri cjalât dal pont di viste di une Cjargne sociâl, indulà che une des clâfs pal divignî e à di jessi la furnidure di servizis che a puedin judâ a miorâ la cualitât de vite di ducj, dai nestris vecjos aes gjenerazions plui zovinis. E li che, prime di dut, si sostegni la cualitât de vite dai plui “fuarts”, intindint chei che a puedin jessi i tiessidôrs di Comunitâts dulà che il vivi a Pradumbli, Povolâr, Liussûl, Cleulis e Gjeri al sedi un valôr in plui, e no dome un sacrifici fat di spostaments complicâts par lâ a lavorâ, disasis par no cjatâ ce che al covente e scuelis che no saran plui. Cuntune cualitât de vite che e partissi de culture: cemût che al dîs di tant timp Romano Marchetti – inteletuâl, agronom, figure di prin plan de Resistence in Cjargne – «dome la Culture e pues salvâ la Cjargne», intindint salacor propit la cussience che a scuen jessi daûr di ogni sielte, ricostruint relazions indulà che ostariis e placis a tornin a jessi il cûr dai paîs, ricjatant, al disarès cumò Leo Zanier, il gust di vivi. ❚
Claudio Pellizzari

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +