Inchieste de “La Patrie”: trop sono furlanis lis feriis in Friûl?
- Foro Romano Aquileia
Gjavâts i paisaçs e alc de enogastronomie, lis propuestis a Lignan a son indreçadis a Vignesie
“Vignîs in feriis ca di nô, ospits di int… cence une muse precise”. Se dal 2004 al 2009, sot de zonte Illy, il Friûl-Vignesie Julie si è presentât ai turiscj di dut il mont cul sproc “Ospits di int uniche” fasint jeve su la unicitât culturâl e linguistiche de nestre tiere, vuê o sin rivâts al esat contrari. Lu dimostre la inchieste de “La Patrie dal Friûl”, che us presentìn in chestis dôs pagjinis.
Al principi de stagjon turistiche estive 2018, si sin domandâts: ma trop Friûl cjatino in efiets i visitadôrs che a sielzin pes lôr feriis la nestre tiere? Rivino a capî alc de culture dal teritori là che si cjatin, o podaressino cun trancuilitât cjatâsi a Riccione o in Versilie o a Jesolo? E, di chê altre bande, trop rivìno a atrai i flus turistics che simpri di plui a van a cirî no dome biei paisaçs o biei lîts, ma une imersion totâl intun teritori che al cjape dentri tancj aspiets (ancje il sport e la enogastronomie) ma che al partìs propit de olme culturâl di un puest?
Par chest, di là di analizâ in profonditât il materiâl ufiert su internet (che aromai al è in maniere assolude il strument principâl che il turist al dopre par informâsi e par sielzi lis destinazions des sôs feriis), o vin volût ancje testâ in concret la sveltece e la maturitât des nestris organizazions di promozion turistiche (di PromoTurismo FVG aes Pro loco, fin aes associazions des vuidis turistichis) e ancje des struturis ricetivis (albiercs e albiercs difondûts). O vin fent di jessi un turist polac potenziâl, interessât no dome al biel mâr e ae mont splendide dal Friûl, ma ancje inmagât de sô ricjece culturâl e linguistiche che di chês al à cjatât cualchi notizie par inglês su Wikipedia, e che al volarès puartâ culì in feriis par une setemane la sô famee. I risultâts, fale cualchi ecelence, a son desolants, cemût che o podês lei intal rindicont in bande.
E pûr, altris regjons europeanis a pontin fuart su chest aspiet. Il “claim” che cun chel la regjon francese de Bretagne si promôf, par esempli, al è “Vîf une esperience bretone” e il leitmotiv che si presente al turist al è chel di une tiere “cjantade di une lenghe fantasiose, iluminade di cîi ganzants, colorade des gjinestris e de ricjece dai costums, desiderose di scuviertis”, dulà che la specificitât linguistiche locâl e je duncje un element fondamentâl de ufierte. Par no fevelâ dal Trentin – Sud Tirôl e in gjenar dal mont todesc, dulà che ogni particolaritât culturâl minime e ven enfatizade al turist.
Insume, o jerin partîts prime di altris intal 2004, intant che cumò o vin dismenteât cuasi dal dut chest filon. E nol confuarte che il neu governadôr Massimiliano Fedriga al anunzi une sinergjie turistiche fuarte cul Venit. Za vuê sui sîts dai nestris albiercs si cjate plui Vignesie che lis metis che a permetin di scuvierzi la nestre storie, culture e lenghe. Vino pardabon interès a vivi inte ombre dal leon di Sant Marc?
servizis di Roberto Pensa