Inchieste: trop sono furlanis lis feriis in Friûl?
La promozion concentrade dome su sports, ambient e enogastronomie
Jê stesse, pûr jessint di une isule linguistiche tant che Sauris, no i veve pontât masse. Dopo, viodint il sucès che i microcors di dialet sauran organizâts dal circul Culturâl locâl a àn vût tra i turiscj (chei “normâi”, rivâts li par gjoldisi la mont e cence interès culturâi e linguistics particolârs), si è ricrodude: la nestre identitât e pues jessi un riclam turistic fuart. Paola Schneider, titulâr dal albierc Riglarhaus di Lateis e presidente regjonâl di Federalberghi dal Friûl-Vignesie Julie (che e rapresente 700 impresis dal acet alberghîr), no si maravee alore dai risultâts deludents de inchieste di “La Patrie dal Friûl”.
“Il turisim, che al varès di jessi il compendi di tantis propuestis, al fâs fature a unî culture e atrat – e sclarìs Schneider -. La culture e devente atrat se e rive a unîsi in maniere organiche cun altris propuestis. Par ufrî un pachet turistic plasevul si à di unî culture, paisaç, ambient, gastronomie. Il turisim in Friûl-Vignesie Julie vuê invezit al è intindût cuasi dome tant che sports, ambient e gastronomie. Chescj a son i temis che su chei si fâs tant afidament pe ufierte de mont e dal mâr. De culture si dismenteisi dispès, relegantle ai grancj festivai, dal sigûr cetant impuartants, ma dismenteant di valorizâ la scuvierte des nestris particolaritâts, e tra chês dal sigûr e je la ricjece linguistiche e culturâl dade de convivence dal furlan cui dialets slovens e todescs. Chest aspiet al è il parint puar de promozion e de ufierte turistiche. Dispès, no vin il coraç di crodi che disvilupâ chest filon al podarès dâ vantaçs a pet di altris zonis concorintis”.
Propit dal so osservatori di Sauris, stimie che chest gjenar di turisim al puedi dâ sodisfazions economichis ai imprenditôrs dal setôr? Altris regjons talianis (tant che il Sud Tirôl) e europeanis (par esempli la Bretagne) lu calcolin un element fondamentâl, ancje parcè che al ative un turisim di nivel plui alt, disponût ancje a spindi di plui.
“O soi dacuardi cu la sô considerazion, e la rispueste e je dal sigûr positive. Il probleme di fâ des lidrîs une propueste turistiche al sta inte sensibilitât dai operadôrs: se lis lidrîs tu lis sintis, al è facil proponilis parcè che di chestis al è travanât dut l’ambient ator e il paîs. In chest, no vin nuie di invidiâ al Trentin – Sud Tirôl, anzit o vin conservade une ricjece e une gjenuinitât plui grande des localitâts dal turisim di masse des provinciis di Trent e di Bolzan, impuaridis des misturis e de prevalence dal afâr. A Sauris, dal centri etnografic ai cors di sauran par turiscj, a son tantis ocasions ancje pal visitadôr ocasionâl di capî che o tignìn tant ae nestre storie e culture. E al è cussì in dut il Friûl-Vignesie Julie, e pûr si fâs fature a fâ di chest patrimoni une ufierte turistiche. I circui culturâi, lis Pro loco a fasin fadie a metisi in rêt cun nô gjestôrs di albiercs, forsit nus viodin interessâts in maniere esclusive ai afârs, e dal sigûr o vin une part di colpe. Nus volarès cualchidun che intal sisteme turistic si impegnàs a fânus dialogâ par capî ce che si pues fâ insiemi par rindi trative la scuvierte des nestris lidrîs”.
Di dulà si podaressial partî?
“Formant int che e conti il teritori e che e puedi acompagnâ i turiscj in plui lenghis a discuvierzi i segns de nestre civiltât. O pensi par esempli ai tancj museus sparniçâts sul teritori. E covente la volontât di mostrâsi, di dî al mont che o sin ancje nô. Chest filon di marcjât al podarès jessi ricjapât in particolâr des localitâts e des impresis plui piçulis, che forsit lu sintin di plui, pluitost che copiâsi a vicende simpri su lis stessis tematichis e iniziativis. Dal sigûr, tantis personis a presearessin chest gjenar di propueste. Ancje jo o ai fat fature a crodi in cheste nicje di marcjât, mal àn vût di dimostrâ cui fats che chestis tematichis, che o ai stimât simpri tant impuartantis pe mê vite, a podevin deventâlu ancje pe ufierte turistiche dal gno albierc. Il nestri circul culturâl al propon tantis robis, ma no lis vevi viodudis mai sot de prospetive turistiche. Dopo, o ai constatât cui miei voi il sucès dai piçui cors di sauran par turiscj e mi soi ricrodude. Tant che gjestore di albierc no i varès pensât mai, e pûr e je stade une iniziative tant gradide dai miei ospits. O pensi che o podaressin vê sodisfazions tant grandis ancje dai turiscj “normâi” cjatant ocasions di fâur cognossi lis nestris lidrîs. L’operadôr al à bisugne di jessi stiçât in chest sens”.
La Regjon e à un rûl impuartant inte promozion turistiche. Ce domandaiso tant che gjestôrs di albiercs al gnûf president Fedriga?
“Prime di dut, di no disfâ dut ce che al è stât fat fin ca. E je vere che cui che al guvierne al à di vê il so program, ma si à di salvâ ce che al funzione ancje se lu à fat cualchidun altri. Une volte al jere il sproc “Ospits di int uniche” che a mi mi plaseve tant, parcè che al pontave su la nestre unicitât culturâl intal contest european. Dopo, a son rivâts al guvier altris che a àn distrut dut ce che al jere stât fat su chest cantin”.
di Roberto Pensa