Sfuei Mensîl Furlan Indipendent
Archivi de Patrie

In spiete de Rai, ae fin dal 2018 e je nassude EjaTV-Sardegna2

............

Une esperience là che si dan dongje sogjets diferents
che a metin in comun passion, professionalitât,
competencis tecnichis e cussience identitarie

Dal web al digjitâl terestri. Juste ai 31 di Dicembar stâts e je stade screade la prime vere television dute par sart e tes lenghis “altris” de Sardegne. Si clame EjaTV-Sardegna2 e par vincjecuatri oris ogni dì e cuvierç il canâl 172 cuntune ufierte svariade di contignûts. In spiete che ancje la concessionarie dal servizi public radiotelevisîf e fasi finalmentri ce che al è proviodût de leç 482/1999 cuntune programazion televisive par sart (in sostance, par cumò al è dome alc par radio), chê inviade te ultime dì dal an passât e je pardabon une esperience interessante, là che si dan dongje sogjets diferents che a metin in comun passion, professionalitât, competencis tecnichis e cussience identitarie.
EjaTV-Sardegna2 e je une television gnove, ma si insuaze intun progjet che al è stât inviât za uns pôcs di agns indaûr. Te sô ideazion e te sô realizazion, al à un rûl fondamentâl Tore Cubeddu, senegjatôr, regjist, organizadôr di iniziativis culturâls e produtôr tal cjamp audiovisîf, che in cheste iniziative al à metût dentri lis sôs diviersis cognossincis, de lenghe sarde al cine, de scriture creative aes azions di politiche linguistiche.
Une novitât nassude (almancul) cinc agns indaûr
«O vin tacât cinc agns indaûr tant che web tv – al conte Cubeddu -, ma za tal 2011 e salacor ancjemò prime o vevin a clâr i nestris intindiments: fâ comunicazion e informazion di cualitât in lenghe sarde e doprâ chê stesse lenghe tant che normâl, moderne e vive». Al è cussì che a nassin Terra de Punt, la cjase di produzion audiovisive di Tore, e EjaTV, che tal 2014 e ven regjistrade tant che testade gjornalistiche.
«Fin dal principi o vevin chê di meti adun un canâl televisîf par sart, là che a varessin podût cjatâ spazi ancje programs fats par catalan algherês e ta chês altris espressions dal patrimoni linguistic de Sardegne: il tabarchin (che al è un dialet gjenovês particolâr che si fevele tai comuns di Carloforte e Calasedda), il galurês e il sassarês», al ricuarde Cubeddu. Però in chel moment no si rive a vê une frecuence, e par chel EjaTV e scomence a esisti dome su internet cu la difusion di programs di gjenar diferent, a tacâ des diretis di events culturâi e sportîfs che a vegnin curadis di Terra de Punt, di cualchi cine par sart produsût de stesse societât e di trasmissions di intratigniment o di aprofondiment informatîf fatis par esempli intun spazi specific dal Teatro Massimo di Casteddu/Cagliari.
«Stant che la vecje leç regjonâl 26/1997 pe promozion dal patrimoni linguistic de Sardegne e proviodeve contribûts pes emitentis televisivis, ma no pe produzion – al zonte Cubeddu -, la nestre realtât e jere taiade fûr di chê forme di finanziament. Nol è un mâl che nol sedi un ben, stant o vin scugnût lâ daûr di une logjiche di marcjât disleade dal discors de lenghe, ma che propit par chel i à zovât ancje ae lenghe. Cun di fat, nus vignive domandât di fâ la direte di un spetacul o di un event, cence indicazions specifichis in cont de lenghe e cussì noaltris o fasevin dut inte maniere miôr in tiermins tecnics e intant i zontavin ancje la lenghe sarde. I nestris clients si son rindûts cont che la robe e funzionave e a àn continuât a dânus lavôrs di cheste fate, e ancje a domandânus di fâju par sart».
Lenghe vive, television di comunitât e economie di teritori
Za in chel moment, dongje di Terra de Punt, e saponte l’inviament dal progjet EjaTV ancje une altre esperience imprenditoriâl: e je chê di Sardex, il circuit di credit comerciâl pes piçulis aziendis sardis, fondât su la circolazion di une monede complementâr e su la poie mutuâl jenfri lis impresis dal teritori. «La idee e jere chê che dongje de economie dal teritori e de comunitât – al zonte ancjemò Cubeddu – e fos ancje une television di comunitât, che e prodûs comunicazion e culture che a son in stât di zovâ ae promozion des impresis e dal teritori là che a operin».
Cun di plui, e ven metude adun ancje la associazion Babel, che e inmanee a Casteddu il Babel Film Festival, rassegne di cine dedicade ae produzion audiovisive tes lenghis “altris” di dut il mont, intant che Terra de Punt e va di lunc a produsi e la ufierte sul web EjaTV si inricjìs di materiâi, rivant a cuvierzi ancje il sport, a tacâ di une colaborazion cul Cagliari Calcio.
E propit de colaborazion jenfri Babel e Terra de Punt – che intant e formalize la sô proprietât di EjaTV e Produzioni Sardegna, societât organizadore di une schirie di manifestazions in dute la Sardegne – e nas la television cemût che si le viôt cumò.
Sa tv de sas limbas de Sardigna
Lis cundizions par inviâ cheste colaborazion a son dôs, cemût che al conte Cubeddu: «Di une bande e je la gnove leç pe politiche linguistiche regjonâl, la 22/2018, che e previôt ancje il finanziament pes cjasis di produzion, e di chê altre ognidun dai trê sogjets che al à rivât adore, juste par chel, a vê un contribût de Region Sardegne. A chel pont, o vin pensât che al jere ben dâsi dongje intun progjet comun: la idee di EjaTV e jere simpri valide e dopo verificade la disponibilitât dal canâl di Sardegna2, o vin fat il passaç sul digjitâl terestri».
Regjiscj, produtôrs e musiciscj a àn za metût a disposizion i lôr prodots – curtmetraçs e luncmetraçs di finzion o documentazion, videos musicâi, regjistrazions di concierts… – che a van a rotazion adun cui materiâi dal archivi dal Babel Film Festival e cun programs gnûfs, che par solit a passin te fasse orarie de sere. Il palinsest al va daûr dai filons tematics za definîts pe web tv. Par esempli: Sonos (musiche), Novas (informazion), Entula (art), Astros (sience e tecnologjie), Cinema (cine), Siendas (aziendis) e Cagliari Calcio.
Dongje de rispueste dal public al va ricuardât che il progjet EjaTV-Sardegna2 al impegne siet dipendents, tra part tecniche, part creative e par comerciâl, «O sin contents. La robe e je tacade ben e e larà ancjemò miôr pal avignî: o sin daûr a inricjî il palinsest e a inviâ ancje la racuelte di publicitât. Ma soredut – al marche Cubeddu – ce che nus da sodisfazion al è di vê dât un spazi concret ae lenghe sarde e a chês altris varietâts de Sardegne, che fin cumò la lôr presince par television e jere limitade te forme, tai contignûts, pe plui part “vecjos” e “folcloristics” e tal timp, cuntune discontinuitât cuasi causâl, tant che un zîr in gjostre une volte ogni tant». ❚
Marco Stolfo

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +