Il “Rosa dell’Isonzo®”, un lidric di scuvierzi

L’Istitût tecnic agrari “A. Brignoli” di Gardiscje
al è il cûr di un progjet economic
util par une aree di 35 Comuns
Za intai agns ’60 dal Nûfcent, il gastronom venit Giuseppe Maffioli (1925-1985) si preocupave de brute ande bande la uniformitât che a jerin daûr a cjapâ lis cusinis regjonâls. «Uniche robe rampide, almancul ca di nô (in Venit, ndr) – al scriveve – la frescjece di une salate o di un lidric, che a puedin rivâ fintremai al rûl di rose, inte lôr bielece svariade e crocante». Dal sigûr si riferive ai lidrics trevisans, ma la considerazion mi pâr otime ancje riferide al nestri teritori regjonâl e, in mût particolâr, ae zone di Gurize e ae Riviere furlane dulà che si prodûs la Rosa dell’Isonzo®. Une ortaie tipiche, di une tradizion ultracentenarie che e à tornât a cjapâ fuarce in chescj ultins agns. Di fat, “Colori e sapori di una squisita storia del Friuli Venezia Giulia” al è il sottitul dal libri “La Rosa dell’Isonzo®”, a pene publicât di L’Orto della Cultura (104 pagjinis, 18 euros). Un progjet editoriâl coletîf, coordenât dal gjornalist Adriano Del Fabro, dulà che ogni part e je rimetude a un protagonist dal rilanç di cheste culture.
Marco Fragiacomo, che al è il dirigjent scolastic dal Istitût tecnic agrari “A. Brignoli” di Gardiscje, al conte il parcè de “riscuvierte” di chest “rose di Invier”, lis motivazions che a àn puartât la scuele a deventâ il cûr di un progjet economic util par une aree di ben 35 Comuns (il teritori esclusîf dulà che, daûr dal dissiplinâr, si pues coltivâ la Rosa dell’Isonzo®) che al à za cjapât dentri une trentine di produtôrs che a lavorin sot des regulis di une sole marche regjistrade. Rodolfo De Gasperi, insegnant dal “Brignoli”, al à lavorât su la ricercje des lidrîs de culture dai lidrics inte zone di Gurize, intant che Costantino Cattivello, dal Ersa, al conte il lavôr fat e ancjemò di fâ par miorâ (cu la selezion gjenetiche) lis carateristichis estetichis, lis cualitâts gustativis e salutistichis. Ma, stant che la Rosa dell’Isonzo® e je dome une des ecelencis di chel teritori, de valorizazion dai vins locâi si è ocupât l’enolic Alessandro Dal Zovo. Des mîls e de impuartance de apiculture dal Lusinç al à scrit Adriano Del Fabro, in plui de descrizion des tecnichis di culture de Composite che a partissin de racuelte de semence, fin ae produzion de colorade “Rose” che si racuei e che si consume intai mês di Dicembar, Zenâr e Fevrâr.
Tecnics, duncje, insegnants e gjornaliscj unîts par contâ une biele aventure che e je daûr a inviâsi, cun passion e decision, intal compart un pôc fer de orticulture furlane. Nol sarès nuie, però, cence i vêrs protagoniscj de conte. I oms dai cjamps, i tancj coltivadôrs che a àn crodût inte propueste, si son unîts intun Consorzi di tutele e, a vuê, a àn invistît inte culture dal lidric une ventine di etars par puartâ su lis taulis dai furlans (par cumò…) une ortaie di grande cualitât, uniche e speciâl, di cognossi, capî, valorizâ e… meti tal plat! Nol è propit un câs, alore, che il libri si sieri cu la propueste di 13 ricetis origjinâls elaboradis dal chef stelât, Roberto Franzin, dulà che la Rosa dell’Isonzo® e je la regjine dai ingredients, che ae sô cort si sentin tancj altris protagoniscj agroalimentârs dal comprensori di riferiment.
La prime presentazion publiche dal libri, scrit intun lengaç sempliç, inricjît di tantis fotografiis bielonis (la plui part e je opare di Laura Tessaro) confezionadis intun dissen grafic elegant di Andrea Macelloni, e je stade fate ai 16 di Fevrâr a Gardiscje, elete capitâl de “Rose”. Propit li, par celebrâ la jessude dal libri ma, soredut, la bontât e lis oportunitâts che a podaressin vierzisi intal slargjâsi dal progjet, e je stade fate la prime Mostre/Fieste/Cerce dedicade dal dut ae Rosa dell’Isonzo®. Une scree uficiâl e di bon auguri, si spere, par che cheste tradizion e cjati un gnûf teren fertil e che e dedi struments di economie e lavôr ancje ai zovins che, a cheste, a vedin voie di apassionâsi. ❚