In Friûl il miôr de produzion artistiche in lenghe minorizade

Cuatri dîs di concierts, incuintris e proiezions
che a pandin identitâts, sensibilitâts, ideis diferentis
Suns Europe ancje chest an al puarte in Friûl dute la ricjece e la vivarosetât espressive che e nas de diversitât des culturis di minorance, fasint dal nestri teritori une plateforme di incuintri e di confront di identitâts, sensibilitâts e ideis diferentis. Clamant dongje i miôr talents artistics, che a presentin la lôr produzion plui resinte a un public zovin, internazionâl, curiôs e creatîf, Suns Europe al è la dimostrazion concrete dai valôrs dal plurilinguisim e di trop che lis tantis lenghis minorizadis che si fevelin in Europe a pandin viertidure e modernitât.
Aromai rivât ae cuarte edizion, Suns Europe – in program a Udin (e no dome) dai 29 di Novembar ai 2 di Dicembar – al à ben clârs i siei obietîfs: “Dirit ae lenghe, dirit ae diversitât”. La mission e je impuartante e ambiziose: promovi lis produzions artistichis contemporaniis intes lenghis minorizadis europeanis cul obietîf di sostignî la costruzion di une Europe diferente, unide inte diversitât, fondade sui dirits, sul pluralisim, sul rispiet e su la colaborazion.
Suns Europe – un progjet organizât de cooperative Informazion Furlane cu la poie finanziarie de Agjenzie Regjonâl pe Lenghe Furlane, de Regjon Friûl-Vignesie Julie, dal Comun di Udin e de Fondazione Friuli – si conferme il festival european principâl che al conte e al fâs cognossi, a ducj, lis lenghis minorizadis, tant che al gjolt dal patrocini dal Consei de Europe e dal Network to Promote Linguistic Diversity, la rêt europeane pe promozion de diversitât linguistiche.
Moment centrâl de manifestazion, sot de direzion artistiche di Leo Virgili, al è come simpri il conciert al Teatri Gnûf “Giovanni da Udine”, che si tignarà sabide il prin di Dicembar, aes 9 di sere. A lâ sù sul palc, dongje dai parons di cjase dal Friûl (Luna e un Quarto), a saran artiscj che a vegnin dal Cjanton dai Grisons (Dario Hess), dai Paîs Catalans (Jansky), ma ancje de minorance svedese de Finlande (Laura Hoo), e po dopo de Galizie (Espiño), dal Paîs Basc (Rodeo), dal Gales (Yr Ods), de Basse Sassonie (Melissa Meewisse) e de Ladinie (Martina Iori).
In program ancje altris concierts, e po incuintris, proiezions e il spetacul teatrâl “Donald dal Tiliment”. Plui informazions sul sît www.sunseurope.com ❚
Redazion