“In File”: di dulà vegnial il titul de manifestazion

File o filò e jere la vegle che i contadins a fasevin dopocene, fin a miezegnot, di Novembar a dut Fevrâr, in tantis stalis.
Probabilmentri il tiermin file o filò, al vignive dal lavôr feminin fat de maiorance des feminis inte stale, il filâ, apont. Si leve intes stalis par mantignî la socializazion intal unic “ambient” riscjaldât intal Invier lunc e dûr. Un vêr lûc di svagament, prime che a rivassin i prins televisôrs intai agns Cincuante, dulà che si contavin storiis, flabis, esperiencis. A jerin ancje stalis cul filò a teme: une stale specializade in contis dal orôr, une in peteçs, o si podeve sintî a pontadis, tant che intune fiction di vuê, la storie di barbe Pieri che al veve fate la vuere dal 1915-18.
IN FILE
Discurint poi des fileres,
par chês stales dongje i bûs,
van filant dutes les seres
un siet-vot maçui di fûs,
cjacarant d’ogni fantate:
no savês chê, ch’a cjol chel…
cjare vô… mi pâr ch’a è mate,
che no ‘ndà piç di cerviel!
Les nuviçes po contante,
che saran chest carnevâl,
e di lôr simpri slengante:
chê e fâs ben, l’altre fâs mâl.
E cussì par ogni file
si discor di zoventût,
e di ducj ju fats de vile
che savê lor àn podût.
I umin poi stan cjacarante
su le grepie ben sentâts
o la vacje o il bo laudante,
discurinte di mercjâts.
E cussì l’unviâr va vie
cul scjaldâsi un pôc par lûc,
o in te stale o in ostarie,
o in te cove o dongje il fûc.
(Florendo Mariuzza,1766-1854) ❚
✒ O.P.