SIMPRI BOGNS. Zuan Schiff, “Poesiis di Zaneto”, Udin 1977

“Tine: ‘Par plasê, done Catine / isal cjase il sior plevan?’ Catine: ‘Si po, Tine, che l’è cjase: / jentrait dentri su dorman / e siarait che no mi s’ciampi / pal porton cualchi gjaline. / Se no sbagli a l’è in cusine, / donge il fûg cal dis l’ufizi. / Ca l’è simpri un dentri e fûr, / matrimonis o batisins; / a l’è brâf a tignì dûr, / e tant jo che il sior paron / mangìn simpri a s’ciafoiòn’”.
Cussì e scomence la prime des sessantesîs composizions, metudis adun in chest libri, gjavantlis des pagjnis de Vita Cattolica intal periodi jenfri lis dôs vueris. Pre Zaneto (1872-1947), plevan di Percût, al veve un pôc ereditât l’’estro mat in poesie ‘di Zorut, ma al si seste suntun scjalin ben plui bas di lui. Il titul dal libri al fevele di poesiis, ma, disinlu subit, inta chestis scuasi cuatricent pagjnis, no ‘nd’è poesie. E disìn ancje, subit, chest mût di doprâle i fâs plui mâl che no ben a la lenghe. Il mess che al passe al è clâr: cheste lenghe e je buine dome par contâ sflocjis, mignagnulis, fufignis. Cun di plui e je plene di peraulis talianis (disturbo, p.11, anticipo p. 13, rimprovero p.18, perbacco p. 33, fango p. 63 e 181, profugo p. 184, incontro p. 119 e 131). E i furlans, cuant che a scugnin rispuindi par talian, in realtât a fevelin un venit pastrocjât. Nancje dal pont di viste de costruzion dai tescj no salvi Zaneto. La metriche des voltis e je aprossimative, cualchi rime sfuarçade. Se po o volin jentrâ intal mert di ce che al dîs, chescj viers a son il trionf de banalitât, dal nuie, no une volte che al sedi bon di sgrafâ la realtât, di dî alc di origjnâl, di profont. Il tip di societât che al à in ment lui al samee fat par int che no à di pensâ: al è pecjât lâ intes ostariis, bevi, fâ sport, nadâ, parfin ridi e cjantâ. E cuant che lis autoritâts fassistis i proibissin di rimâ par furlan al si adegue e al pistrice su un talianot plen di strambolots (Letaris piardudis p. 150). Altris voltis, no si capis parcè, al si bute sul piavot o al simiote il napoletan o il sicilian. La sô adesion al fassisin e je tiepide, ma al ven di pensâ che, se il regjim al fos stât un altri, di altri segn, al vares aderît ancje a chel, pur di vivi cuiet. E infin no si pues no rimarcâ il dispresi pes feminis che al salte fûr ogni volte che al si intope a fevelâ di lôr: “Capissin pôc, copari; / àn un ciavut lizer”; “…fâs lis voris, / cjale, osserve, glot e tâs”.
Si salvie propi nuie, alore? Ben, cualsisedi test nus dîs alc, se no altri come testemoneance, in negatîf, di une epuche.
Ma alc, alc di so, no isal propi nuie di salvâ? Ben, se propi o ai di salvâ alc, jo o salvares I bregons di Zaneto (p. 141), dulà che al conte di ce maniere che al è restât tacât intun confessionari apene vernisât, li dal santuari di Barbane :”…e lì o lassi sequestrade / la cularie dai bregons”. ❚
Laurin Zuan Nardin