Sfuei Mensîl Furlan Indipendent
Archivi de Patrie

Alessio Screm al ricuarde Giovanni Battista Cossetti, compositôr cjargnel

............

Chest an a son 60 agns de muart di Giovanni Battista Cossetti. Il volum a pene publicât Giovanni Battista Cossetti e la riforma della musica sacra in Friuli tra Ottocento e Novecento dal musicolic Alessio Screm pe cjase editore Forum nus puarte ae riscuvierte dal preseât compositôr cjargnel. Une monografie di 500 pagjinis – il libri plui complet sul autôr – risultât dai trê agns di dotorât di ricercje pe Universitât dal Friûl di Screm: «Tai miei studis mi jeri interessât a Cossetti, il prin compositôr cjargnel “colt”, che tai siei luncs 92 agns di vite al à produzût cetante musiche» al conte. «Un cjargnel, come me, nassût a Tumieç di famee di umilis origjins ai 22 di Novembar dal 1863, la dî di Sante Cecilie, patrone de musiche e dai musiciscj, che mi soi simpri plui afezionât e che o ai podût studiâ in maniere aprofondîte in gracie ae disponibilitât dai erêts e consultant archivis privâts, chei arcivescovîls di Pordenon e dal comun e dal Domo di Tumieç». Cossetti al è une figure impuartante pe storie de musiche sacre, e un riferiment impuartant pal Cecilianesim, ven a stâi il moviment di riforme nassût ae fin dal Vôtecent par ripristinâ la musiche liturgjiche, che in chel periodi e vignive “deturpade” de musiche di savôr operistic e balabil. «Il contest de musiche sacre furlane al è cetant impuartant, baste nomenâ Giovanni Battista Candotti e Jacopo Tomadini, che a son stâts in un ciert sens i siei paris spirituâi» al zonte Screm. «Cossetti al fo prime nomenât promotôr regjonâl pe riforme de musiche sacre in Italie e po elet president e delegât diocesan de commission diocesane di S. Cecilie. E in gracie ae sô fervide ativitât Pape Benedet XV tal 1921 lu à nomenât Cavalîr di S. Gregorio Magno. Cossetti al à vût fortune no dome chenti, ma ancje in Italie e tal forest, cuntune produzion di plui di 500 lavôrs sacris e profans e publicant pes cjasis editoris come Carrara, Zanibon, Bertarelli, Ferrario, e parfin Kessel di Tilbourg in Olande». Chest libri nol è dome test, parcè che si cjatin ancje tantis bielis fotografiis di epoche e un cd in zonte: «Dentri a son nûf tocs, lis operis plui rapresentativis de musiche organistiche cossettiane, piçulis perlis fin cumò ineditis, che l’organist Michele Bravin al à regjistrât tal orghin storic Zanin te glesie di Chions, in provincie di Pordenon». Une figure poliedriche, musicist, organist e compositôr, fondadôr di scholae cantorum e bandis musicâls, colaudadôr di orghins e un grant benefatôr. «Un cjargnel cuntun caratar no simpri facil, un perfezionist, al jere lui stes a trascrivi lis sôs composizions, sevêr, fogôs ma al stes timp tant uman» al dîs il musicolic. E un om leât ae sô tiere: «Cossetti al à cetant amât il Friûl, al à lavorât cence polse prime pe Cjargne e dopo pal Friûl ocidentâl. Al è stât organist titolâr e mestri di capele tal Domo di Tumieç e dal 1907 al 1908 inte glesie di S. Zorç a Chions. Al à fondât la bande di Tumieç e tal Friûl ocidentâl al à creât diviersis societâts filarmonichis». Il compositôr al à ancje musicât poesiis di autôrs furlans come La plovisine di Pietro Zorutti. Jenfri chês altris composizions in lenghe furlane o ricuardìn: Lei landât il mês di Mai, Lis sizilis nus bandonin, A mê ninine, Il dopolavôr di Glemone a Vignisie e lis vilotis Lûs la lune e Su chel prât.
Natascia Gargano

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +