Te memorie di Fausto Schiavi come ogni an

Un scjap di autonomiscj, che a forin dal Moviment Friûl, si cjatin ogni an intune zornade dongje dal inovâl de discomparide dal President Fausto Schiavi, sucedude tal Zenâr dal 1972, par memoreâ il so pinsîr politic, chel di pre Checo Placerean e di altris protagoniscj; racuei la documentazion di tantis azions politichis dal partît dai agns dal ‘60 indenant, valutâlis in forme storiche e conservâlis intun Archivi digjitâl, an daspò an (http://www.archivi.movimentofriuli.it/).
Chest an, ai 25 di Zenâr, si son cjatâts a Davâr in Cjargne. Adrian Cescje al à fat une comunicazion par ricostruî, su la base de documentazion in archivi, la evoluzion de identitât ideologjiche dal Moviment, de sô fondazion fin ai agns dal ‘70.
A judizi di ducj i vielis ativiscj dal Moviment Friûl che si son cjatâts a Davâr, al è tornât a partî il procès di distruzion de autonomie dal Friûl, che lu vuelin inserî intune macroregjon, a dominance venite, daûr dai plans dal guvier za pandûts in maniere informâl tai mês passâts.
A àn ancje decidût di inmaneâ, cuant che al sarà il moment, cualchi iniziative par cirî di sensibilizâ la opinion publiche propit a rivuart di cheste gnove copete che e je daûr a plombânus, se no si fâs alc par sconzurâle.
A son convignûts a Davâr: Zuan Franc Passon, Antoni Marc Covàs, Rem Spicemei, Aldo Barachin, Sarç Val, Mario Falescjin, Aldo Caligâr, Claudi Sion, Zorç Jus, Mateu Bortuç, Duili Cescut, Adrian Cescje, Zorç Cividin, Rinç Maiorche, Albert Fabris, Zuan Carli Cjastelarin, Ferdinant Di Cente, Valentin Garzon, August Di Cec, Renât Jervâs, Anriut Bansandiele, Robert Visentin. ❚
Redazion