Sfuei Mensîl Furlan Indipendent
Archivi de Patrie

Il variûl si sta slargjant su lis monts dal Friûl

Gianluca Rassati
Variûl o grifon (Gyps fulvus)
la Mariane

Il variûl, clamât ancje cul non di grifon (Gyps fulvus), al è ancjemò dispès considerât un uciel di rapine che al prede in maniere ative ancje animâi dumiestis: in realtât, al mangje animâi muarts e dome in ocasions pardabon une vore raris al pues cjapâ predis vivis, ancje se simpri cetant debilitadis.
◆ Par vecjo al viveve in buine part de Europe meridionâl, in Nord Afriche, in Medi Orient e intal setôr meridionâl da la Asie centriocidentâl. Intal secul XX, dopo de persecuzion che i è stade fate, dal invelenament di carognis par combati i predadôrs e dal cambiament des pratichis di gjestion dal besteam, al è sparît te plui part dal areâl.
◆ In Italie, dome la popolazion sarde e je rivade fin ai nestris timps; la ultime colonie riprodutive siciliane e jere presinte fin intal 1965 sui Monts Nebrodi: la nidificazion e je finide par colpe di bocjadis invelenadis metudis pe bolp (Vulpes vulpes).
◆ Dai agns Otante di chel altri secul, in Italie a son tacâts progjets di reintroduzion de specie che a àn permetût, dutune cu la protezion dal variûl e des localitâts dulà che si riprodûs, l’insediament di gnovis popolazions che, intal timp, graciis aes nidificazions a àn puartât a une incressite dai individuis.
◆ Ancje in Friûl, a Curnin (Forgjarie), a son stâts molâts individuis tacant dai prins agns Novante dal secul passât, intal ambit di un progjet specific. Sul imprin, a son stadis verificadis nidificazions in areis dongje di chês de sede dal progjet. Po dopo, il variûl al à tacât a sparniçâsi e a nidificâ in cualchi sît, simpri inte zone prealpine.
◆ Vint verificât cheste tindince continue ae espansion, confermade di un numar simpri plui grant di osservazions ator pes monts, l’autôr al à metût adun un studi, cun chê di incuadrâ il fenomen espansîf inte zone alpine. Intal monitorament a son stadis frontadis diviersis dificoltâts par vie de ruspidece e de complessitât des zonis di mont, e de posizion e de distance di cierts sîts a pet di dulà che a vignivin fatis lis osservazions.
◆ Cinc agns indaûr a son stâts regjistrâts i prins tentatîfs di riproduzion, in particolâr intal massiç de Mariane. Po dopo, sedi su la Mariane che sul Strabût (Tumieç) e je stade verificade la nidificazion, individuant i prins sîts riprodutîfs in zone alpine furlane.
◆ Intai ultins agns, a son stâts cjatâts doi gnûfs sîts intes Alps Cjargnelis e cuatri intes Alps Juliis, fra i 550 e i 1500 m s.l.m.: il plui distant al è a cuasi 50 chilometris di Curnin. Lis coloniis a jerin formadis di une a 5 cubiis.
◆ Intal 2021, in dute la zone alpine furlane a son stadis cjatadis 16 cubiis teritoriâls: 13 si son riprodusudis e a àn fat saltâ fûr dal nît 9 zovins.
◆ La espansion dal areâl riprodutîf dal variûl bande Nord e je tacade prime viers lis Alps Cjargnelis ma e je stade plui consistente su lis Alps Juliis, dulà che e à interessât diviersis valadis secondariis dal Cjanâl dal Fier, e e je rivade fin inte Valcjanâl. Cierts sîts dulà che il variûl al à nidiât, a son cuasi sul confin cu la Slovenie e il plui setentrionâl al è a pôcs chilometris de Austrie.
◆ Tes Alps Cjargnelis, la espansion e je stade verificade su lis monts de val dal Tiliment viers Vile, e inte val de Fele inte zone di Mueç.
◆ Il variûl si sta slargjant ancje in zone prealpine (dulà che al nidifiche di 400 m s.l.m. insù) e ce che al è stât cjatât dal studi al mostre une situazion favorevule ae specie e a une sô espansion ulteriôr. Di fat, la distribuzion atuâl e permet un colegament plui grant fra lis areis di riproduzion consolidadis e e facilite la permanence dai uciei in ambients tipics alpins, frecuentâts dut l’an graciis a un clime plui dolç di une volte, e aes plui grandis cognossince e esplorazion dal teritori che a judin a cjatâ il mangjâ e a podêlu sfrutâ.
◆ La popolazion furlane e je la uniche che e nidifiche su lis Alps, duncje il so moment favorevul al è impuartant pe conservazion de specie. Al vûl però che chest periodi propizi e di potenziâl principi viers dal sfrancjament riprodutîf definitîf nol seti comprometût di progjets che a son fats passâ come favorevui al ambient tant che, par esempli, la realizazion di palis eolichis o di eletrodots che, invezit, a puedin pesâ a fuart su popolazions interiis di speciis protetis tant che il variûl.❚

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +