Sfuei Mensîl Furlan Indipendent
Archivi de Patrie

Cuant che la lenghe e insiore e e unìs

Serena Fogolini

Strane cuistion, la identitât. Ti si tache intor che no tu sês inmò nassût e ti compagne par ducj i trois de tô vite. No simpri si è dal dut cussients di cheste seconde piel che nus vistìs, che si nudrìs des nestris stessis emozions e che e cres e si tramude daûr des nestris esperiencis. Dispès, al è propit il moment che o pretindìn di dâi une forme perfete, ugnule e statiche, che le condanìn a jessi vistît e no plui spieli de nestre sacume. Tant che une celule, une identitât vivarose e à bisugne di relazions, confronts, scambis cul difûr par podê jessi pardabon in stât di sorevivi.
◆ Ve che ancje un cors di lenghe furlane al pues deventâ la ocasion par svicinâ continents e meti in contat culturis diviersis. Inte edizion di secont nivel dal cors pratic di lenghe e culture in linie par cure de Societât Filologjiche Furlane e finanziât de ARLeF, di fat, in plui di imparâ lis regulis de gramatiche e de grafie e di cognossi miôr la storie de lenghe e de leterature, i arlêfs a àn vude la pussibilitât ancje di fevelâsi e di cognossisi tra di lôr, in gracie dai sportei di conversazion.
◆ Une maniere par podê scoltâ ancjemò la lenghe dai vons, come par Gianni, nassût in Canadà di gjenitôrs furlans (un di ca e un di là de aghe), che cul so furlan niçulât de cadence americane nus puarte a scuvierzi la sô tiere. Ma al è ancje cui che il furlan no lu à mai fevelât, aben che al sedi in Friûl di passe 50 agns, tant che Valerio, vignût sù de Pulie par amôr ta chê che e je deventade la sô gnove cjase. Setemane dopo setemane, la cjacarade cun lui, che tal imprin si fermave al mandi, e devente simpri plui siore di peraulis, che nus contin ancje di usancis e di tradizions dai siei paîs di divignince. Ancje Michela no fevele furlan, par une toscane come jê e je pardabon une lenghe foreste, ma, compliçs ancje i amîs, daspò un scjampon te nestre regjon pes vacancis, e je restade striade no dome dai puescj, ma ancje de cjacarade, e finît il cors di prin nivel si è butade cun entusiasim ta cheste gnove aventure.
◆ A son ancje i “malâts di furlanie”, come Lenart, argjentin cul balin par dut ce che al à a ce fâ cul Friûl che nol piert ocasion par imparâ e, daspò dai prins cors cui mestris dal fogolâr furlan, al à metût dongje un côl di atestâts e cumò al tache a tirâ dongje ancje ricognossiments tai concors leteraris. Dongje di lui, Eduart e Noemi, siei insegnants e cûr e anime de Sociedad friulana di Buenos Aires. Di un altri fogolâr argjentin e rive ancje María Alejandra, biel che de Svuizare nus ten compagnie Manuela, arleve passionade dai cors di furlan par vie che al à une vore di someancis cul so dialet.
◆ Ancje par Nezka l’interès al ven di peraulis similis al sloven che e fevelave tal Cuei, in plui di jessi une buine ocasion di confront par une citadine dal mont come jê, che ore presint e vîf tra Israêl e Bruxelles.
◆ La liste e je inmò lungje e e cjape dentri scuasit 60 personis di dut il Friûl e di altris continents che in Zenâr a son rivâts insom di cheste esperience di insiorament personâl, ma ancje di condivision e di viertidure viers altris realtâts.
◆ Une gnove edizion dal cors di prin nivel (che al à par fonde il libri “Lenghe e culture 1” par cure dai professôrs universitaris Maria Chiara Visintin e Gabriele Zanello) e tacarà pe fin di Fevrâr. Par informazions: formazione@filologicafriulana.it. ❚

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +