La Slovenie tra energjie nucleâr, eoliche e solâr

Daspò che la Comission europeane, daûr dal sburt di un grup di paîs membris de Union – ancje de Slovenie – e à metût ancje ae energjie nucleâr la etichete di invistiment “vert”, in dut il paîs si va indenant a discuti se la tecnologjie che e je daûr dal nucleâr e puedi vê cheste catalogazion, par esempli a front des fonts che si puedin rinovâ.
◆ Il guvier de Republiche di Slovenie al sosten dut, sedi i invistiments par vê energjie dal aiar, de aghe e dal soreli, sedi chei che a smirin a dividi i atoms dal urani.
◆ Dut câs, la energjie nucleâr, te strategjie dal Stât, e reste la font energjetiche di fonde e plui stabile pal futûr, soredut di cuant che tal paîs si à bandonât il cjarbon.
Par Iztok Tiselj, che al lavore pal Istitût di ricercje Jožef Stefan, la energjie nucleâr e je la font di energjie plui nete, ancje se no rinovabile. Ancje fasint un confront tra chês nucleârs e altris fonts energjetichis rinovabilis, par Tiselj i vantaçs de energjie nucleâr a saressin evidents, parcè che si varès di tignî cont di ducj i prôs e i cuintris. Su la belance a laressin ancje i refudums produsûts, il spazi teritoriâl che si dopre e lis cuantitâts di materiâi che si varessin di sgjavâ par vê lis risorsis rinovabilis a front di chês nucleârs.
◆ Ma a son ancje chei che no son masse convints de energjie nucleâr. Il professôr in pension Peter Novak al pense che te centrâl nucleâr di Krško nol coventi un secont reatôr, propit parcè che si podarès bielzà rangjâsi a vê energjie midiant dal soreli, dal aiar, de biomasse e de energjie gjeotermiche. Cuntun sfuarç programât si podarès rivâ a vê tra i doi mil e i trê mil megawatts di panei solârs.
Il segretari di Stât dal ministeri pes infrastruturis de Republiche di Slovenie, Blaž Košorok, al pense che e sedi valide une cumbinazion di dutis lis fonts. Lis autorizazions energjetichis pal eolic a rivin a plui di 200 megawatts, intant che ae fin dal 2021, in rispueste al ultin bant pe energjie solâr, a son rivadis passe 55 domandis.
◆ Soredut cu la poie de Union europeane, pes fonts rinovabilis in Slovenie si larà indenant a publicâ bants, ma il guvier de Republiche al vûl ancje lâ indenant cul progjet di un secont reatôr pe centrâl nucleâr di Krško.❚