IL SIVILOT. Palaçs confusionâts

CE CONFUSION TAL PALAÇ. A son ducj che a spietin ce che a disaran a Rome, dulà che Pd e Pdl a son i garants dal guvier Monti, insiemit. Ma chi no… e alore al nas il davoi.
Si rive ancje a robâsi lis ideis e lis leteris, almancul daûr di ce che e dîs la “Serachianute” di front dal document inmaneât di Lenna, Gottardo e Camber su lis infrastruturis e su la pussibilitât di gjestion regjonâl par puarts, feradis e colegaments de A4.
«E je robe nestre che o vin dât di firmâ a Pdl e Udc par fâ front comun» e dîs Debora.
«Che si cjapi une camomile» al rispuint Gottardo, ma i cres il nâs tant che Pinocchio.
E sul front eletorâl al è compagn. A son ducj che a proviodin “assestaments” pal 2013 e e sarà ancje cussì… intant la Leghe e fâs l’acuardi cun “Un’altra Trieste”, tant par mostrâ di jessi antifurlane. Al sarès il câs che invezit di jessi pro Bossi o pro Maroni, chi di nô a scelzès se stâ cul Friûl o cu la Padanie, che lis dôs robis dongje no stan masse.
Par ultin o tignìn il scandai sui candidâts dal Pd: il risultât lu savevin prime i gjornâi che no i iscrits: parcè cussì cidins i dirigjents? Parcè simpri la “Serachianute” no à nissune voie di candidâsi e di restâ in Friûl, ma dal scandai al risulte che dome jê e pues meti dacuardi i siei che se no si spachin tra i moderâts di Bolzonello e i çamparûi di Honsell.
Une consolazion: la prime robe pal Pd che e ven fûr dal scandai e je che il dualisim tra Udin e Triest al rivuarde dome une persone su trê.
Mago: chês altris dôs a àn decidût dopomai che a son pe division de regjon. ■
L’OM DI BURI