IL SIVILOT. Debora “double face”

NO SON PASSÂTS NANCJE UN PÂR DI DÎS di cuant che la Serachianute e à dite che e sarà jê a sfidâ Tondo tes prossimis elezions regionâls, che su YouTube al ven fûr un filmât che al pues mandâ in tilt la sô imagjin di candidade. Al mostre il so intervent a une fieste dal Pd dal 2010 a Ravenna e dulà che si sint ce che pense dal furlan a scuele. Une robe vergognose ma no dome parcè che e pues pensâle tant che e à voie, ma al è fals ce che e  dîs, come che une ore di marilenghe e sedi in alternative al imparâ l’inglês.
In plui de lis peraulis e je la maniere che lis dîs: strafotente, di cjapade pal cûl dai furlans. Al somee che chê musute, daûr di une maschere di ingjenuitât, no spieti altri che cjacarâ mâl dai furlans e de lôr culture.
E ancje chest al sarès un so dirit, se nol fos che e je ancje segretarie di un partît che fin a prove contrarie al à votât pe difese e l’insegnament dal furlan a scuele.
Des dôs, une: la Serachianute e je bausarie a Ravenna o in Region. O forsit e je dome romane e i ven spontani. ■
L’OM DI BURI