IL SIVILOT. Cuant varìno une politiche furlane?

La uniche strade e je chê di no restâ sucursâl dai partît talians
Cualchidun al veve fat za il cont di trops implants par tornâ sù, di tropis gnovis pistis e albiercs che si sarès dotade la provincie di Bolzan in cambi dal vôt di astension dai doi parlamentârs de Volkspartei su la fiducie a Berlusconi.
In piçul, al è chel che al è sucedût in Spagne cuant che la poie di Convergència i Uniòn e je stade determinante pe formazion dal guvier Aznar o, a parts invertidis, chel di Esquerra Republicana di Catalunja ae zonte socialiste ae Generalitad di Barcelone.
I partîts che a basin la lôr fuarce eletorâl sul autonomisim a puedin deventâ dispès la gusiele de belance pes sieltis politichis su scjale statâl.
Oportunisim, e je la acuse che e ven indreçade a chest metodi di tratative, naturalmentri di bande di cui che te ocasion al cor il pericul di pierdi il confront e di consecuence il podê.
O lin fin in fonts ae cuistion, parcè che e rivuarde sì i sud tirolês, e in altris ocasions i valdostans, ma soredut nô furlans.
Finint cuntun “-isim” la definizion e sune cuasi in maniere naturâl tant che un dispreseatîf; cjapade intal so sens leterari e vûl dî invezit cjapâ la ocasion, la oportunitât apont.
E se cheste e je rapresentade dai interès de proprie int, dal propit teritori, vadie cjalade cun dispresi? Valino forsit di plui i interès dai talians?
Anzit, o disarès che chest tratâ al met – in chest câs la Volkspartei – in cundizions di fuarce, al cres il lustri devant de sô int: e ven di fat ricognossude la sô paritât di “autoguvier”, a pet dal centri roman.
E, tant par disbratâ il cjamp dal contingjent, vuê al sucêt cun Berlusconi ma al è sucedût cun Prodi e al sucedarà ogni volte e cun cualsisedi colôr di guvier.
Al è di mangjâsi ancjemò une volte lis mans: in Friûl une fuarce cussì no le vin e no le vin vude mai.
Pensait che cuant che plui alt al è stât il pressing istituzionâl su la cuistion furlane – Tessitori, tant par capîsi – il risultât otignût al è stât la regjon di cumò e la capitâl a Triest, propit parcè che a àn prevalût i interès dai partîts talians.
Par tratâ al vûl un moviment rapresentatîf di chei furlans. Cence, no dome no sarà nissune tratative cun Rome, ma nancje une scjassade di dignitât in Regjon.
L’OM DI BURI