Sfuei Mensîl Furlan Indipendent
Archivi de Patrie

ATUALITÂT – Julian Fantino, dal Friûl al Canadà par scrivi la storie

............

TORONTO_ Passant i libris di storie, nol jere mai sucedût che un furlan (ma no dome, calcolât che nancje tra i talians al jere sucedût prime) al fasès part di un guvier conservadôr in Canadà. Ai 4 di Zenâr, Julian Fantino al à dineât cheste tradizion, deventant ministri pai Afârs dai Anzians dopo di un mini rimpast detât dal cjâf dal guvier Stephen Harper. Origjinari di Vendoi di Trep Grant, Fantino al à spindût 40 agns intes fuarcis dal ordin tant che cjâf de polizie di Toronto, di London (Ontario), de York Regjon e de provincie di Ontario, in plui di jessi stât il responsabil de Protezion civîl di Ontario. In Istât al faseve servizi di ordin public pal vertiç dal G8 a Muskoka, a Novembar al è stât elet deputât e cumò al à la cjarie che e je stade di Tony Ianno e Albine Guarnieri, ma in legjislaturis precedentis di fede politiche contrarie, ven a stâi liberâl. In tancj si spietavin che la nomine di Fantino no fos intun dicasteri di prime linie. Daûr dai esperts, chest al consintarà al neu ministri di madressi in cheste gnove vieste, par dopo passâ a un rûl plui impuartant intai mês prossims. Cun di plui, interessâsi dal sociâl i consintarà di diversificâ la sô personalitât politiche intun setôr di rilevance strategjiche dal pont di viste eletorâl, tant che chel dai anzians. “In ducj i agns fats intes fuarcis dal ordin – al comente Fantino – o ai tignût simpri i anzians in considerazion tant grande. O ai crodût simpri che lôr no dome a àn il dirit, ma a meretin atenzion, rispiet, poie e protezion”. Julian Fantino al è pardabon une istituzion” in Canadà, l’enesim furlan che al à savût vignî sù in graciis dai valôrs princips de sô tiere: umiltât, rispiet des regulis e tant lavôr. Prime di lui in cjamp politic si son distintis altris personalitâts leadis al Friûl Vignesie Julie. Sergio Marchi, origjinari di Domanins, al è stât ministri de Citadinance e de Imigrazion, ministri dal Ambient e ministri dal Cumierç Internazionâl intal guvier Chrétien (1993-2003). Intal 2003, Joe Comuzzi al è stât elet ministri di stât, responsabil pes Iniziativis di Disvilup Economic Federâl pal Nord Ontario. Ancjemò, Hubert Badanai – origjinari di Daçan – al è stât il prin furlan inte storie a deventâ membri dal Parlament canadês intal 1958; sîs agns plui tart al à rivistît il rûl di segretari dal ministri dai Lavôrs Publics e po dopo chel di segretari dal ministri de Citadinance e de Imigrazion. Infin Peter Bosa, origjinari di Bertiûl, al è stât il prin senatôr furlan intal Paîs de fuee di aiar, servint il Canadà dal 1977 al 1998, an de sô muart.
Mattia Bello

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +