Il profîl di Cristina Barbierato

Classe 1966, Cristina Barbierato e je origjinarie di Palaçûl. Diplome di liceu sientific te sachete, si è iscrite ae universitât – cors di lauree in Storie –, ma le à molade dopo vê cognossût il so om che al lavorave tal cjamp de produzion di scarpis di alte cualitât. «O ai tacât a judâlu e chest mistîr mi à plasût tant che no ai fat altri te vite», e conte. A Gonârs, paîs dal compagn, Cristina e à vivût bielis esperiencis professionâls, cun aziendis impuartantis. Daspò de crisi grave dal setôr, e je rivade, cun inteligjence e previdence, a riconvertî la sô ativitât, sielzint di proponi al public un prodot sempliç, sostignibil e tradizionâl: i scarpets. Une strade alternative ae massificazion e ae globalizazion, une strade dute furlane, di un artesanât “evolût” che e cumbine tradizion e inovazion tal sens di un cambiament responsabil, cence simiotâ nissun. Par altri, e marche Cristina, «nô furlans o sin stâts ancje punk… no dome salts, onescj e lavoradôrs». Une strade che, tal Otubar stât – cu la sô aziende “Lis Furlanis”, la uniche pal Friûl-Vignesie Julie –, i à viert lis puartis di “ApritiModa”, la rassegne taliane che e met in mostre la ecelence artesanâl dal Paîs: des grandis cjasis di mode ai laboratoris di altissime cualitât. ❚
E.A.