Sfuei Mensîl Furlan Indipendent
Archivi de Patrie

Lis Furlanis, une mode di îr che no à pôre dal avignî

Erika Adami

Tradizion dal artesanât furlan,
creativitât e rispiet pal ambient
intai scarpets fats a man di Cristina Barbierato

«Chest lu tignìn, al podarès coventâ!». E jere la filosofie dai nestris vecjos, che no butavin vie nuie parcè che magari, une dì, chê robe li si podeve tornâ a doprâle. Cussì i bleons fruiâts a deventavin canevacis e cu la lane dal maion slambrât si faseve une barete. A jerin cressûts in timps dûrs i nestris vons, cuant che ogni ogjet al leve utilizât cun cure par fâlu durâ a dilunc e, se no si podeve doprâlu plui pal ûs che al jere nassût, si ’nt faseve alc altri.
◆ Se une volte tornâ a doprâ la robe al jere une necessitât par frontâ la puaretât, in dì di vuê al è un oblic, prin di dut etic, devant dal esaurîsi des risorsis de tiere. E alore, viodi tes “scovacis” no un probleme, ma une risorse, e te “inutilitât” gnovis oportunitâts di creazion dant aes robis destinadis al scovaçon dignitât e ûs gnûfs, e contribuint a ridusi la mont di refudons che nus stan scjafoiant, e je une prospetive buine e necessarie, che e mostre il troi di fâ tal avignî. Un troi che Cristina Barbierato, artesane di Gonârs – cjâf, cûr e mans da “Lis Furlanis” – e à cjapât di un pieç.
◆ Tal laboratori de Basse, Cristina e realize – cun gracie, sens dal biel, cure dai detais e atenzion pal ambient – scarpets fats a man cun materiâi riciclâts. Ju fâs dal 2014, cuant che, cu la esigjence di une riconversion professionâl improvise, e à scugnût cjatâ in curt un prodot che al jentràs intal so cjamp di esperience di vore – chê des cjalçaduris – pûr savint trop che chest setôr al fos sdrumât de recession sedi pal aspiet produtîf sedi par chel comerciâl. «O vevi di individuâ une cjalçadure che e ves carateristichis che i permetessin di cjatâ un so spazi intal mâr imens dal gnûf consumisim globâl – e spieghe Cristina –. Un prodot che al fos bon, di presit contignût, che al utilizàs materiâi di ricicli, cence sostancis incuinantis e di origjin animâl, che e tornàs a doprâ i vecjos machinaris cuntun procès produtîf sempliç e a impat energjetic bas, che al rispuindès a esigjencis estetichis, ma cence dipendi des logjichis de mode, e che al ves ancje un rapuart cul lûc dulà che al ven fat e duncje nol ves bisugne di campagnis complessis di promozion comerciâl». La rispueste e jere a puartade di man, o miôr di pît!
◆ «Fin di frute, a cjase, o jeri usade a meti i scarpets: comuts, lizêrs, fofs, di vilût colorât che ur deve un sens di calôr… parcè no fâju jo? I scarpets a son di simpri produsûts in Friûl e in particolâr di nô a Gonârs dulà che a àn origjinât un pôl des scarpis dilunc dal bum dai agns Cincuante e Sessante dal Nûfcent, e di dulà che a jerin scuasi sparîts. O soi stade inscuelade des personis dal paîs che ju savevin fâ. Mi à volût un an».
◆ E cussì, e je nassude la aziende “Lis Furlanis” (altri mût di clamâ i scarpets, «un biel sunôr, al feminîl»). Cristina e à mantignût la artesanalitât dal procès di produzion, l’ûs dai scampui di tiessût, dal sac di jute, dai cuviertons di biciclete, scjampant la sô industrializazion e banalizazion. «O crôt te bielece de produzion a man, no seriâl, e contignude intes cuantitâts. Intun mês o rivi a fâ 150 pârs sù par jù, lant incuintri aes richiestis di cui che mai domande, privâts e buteghis, instaurant relazions personâls di cressite reciproche». Tantis e bielis ancje lis colaborazions cun aziendis furlanis e dal forest li che dispès i materiâi che ur vanzin a deventin scarpets che a ‘nt insiorin la ufierte.
I scarpets a plasin a ducj: feminis e oms, zovins e vecjos. «No voi daûr des modis, ni de stagjonalitât». Ogni furlane e je fate di doi tocs unics: la suele e je otignude dai cuviertons e dai sacs di jute pal cafè, la tomere di vistîts doprâts e di scampui, tiessûts che Cristina e compre ancje tai marcjaduts o dilunc di un viaç, che a àn une storie, un valôr ancje afetîf, che a consolin e a emozionin, e, te lôr grande varietât di materiâi e colôrs, a fasin sbrocâ la creativitât. Pe produzion a vegnin doprâts stamps, fustelis e machinis di cusî di passe 50 agns indaûr; lis parts a son tignudis dongje di cusiduris a man o a machine, no di colis. In sumis, une cjalçadure pardabon uniche, che e ven di lontan e che e torne a elaborâ il passât te otiche cetant atuâl dal riûs cussient dai materiâi, a vantaç dal ambient. E che, ta cheste logjiche, si pues comedâ cuant che si fruie o il tiessût si sbreghe.
◆ Cristina Barbierato e à fat «un pas laterâl», cuintri corint a pet des tindincis dal marcjât che al tint a uniformâ, a disvalorizâ, a consumâ. «O ai sielt di fâ la artesane, di doprâ lis mans che a nudrissin il gno cerviel e cence sotstâ al ricat dai jutoris, che ti oblein a comprâ imprescj e implants anticipant i bêçs. No je nissune previdence ni rispiet par cui che al fâs une ativitât particolâr. Nol è facil, no ai mai polse, o puarti il lavôr ancje a cjase, ma mi sint realizade parcè che o sai di fâ alc di diferent, di etic, sedi dal pont di viste ambientâl sedi tal recupar de tradizion cu la sô artesanalitât autentiche. Pieri Pauli Pasolini al fevelave de fuarce rivoluzionarie dal passât, eco, jo o soi convinte che al ves reson, che al covente tornâ indaûr e tornâ a tacâ di un model di svilup cetant diferent di chel capitalistic che nol puarte a nuie, se no ae omologazion dal gust, des prospetivis, dal pinsîr, al vualivament des personis. Lavorìn pluitost par un sisteme economic di microimpresis, buinis di ufrî un prodot diferent, responsabil di un pont di viste etic, che cun di plui al valorize la culture dal teritori li che a son insedadis, fûr di produzions seriâls che a limin il cerviel, l’imagjinari».
◆ Fuarte di une filosofie identitarie che e à lis lidrîs intun patrimoni culturâl di tradizions antighis, la aziende “Lis Furlanis” e sta traviersant la pandemie di Covid-19 cence rivocs negatîfs, gjavât il periodi di sieradure de Vierte stade cuant che no si podeve lâ tal puest di vore. E à in cantîr gnûfs progjets che a cjalin, nancje a dîlu, bande la tradizion, chê de produzion ceramiche furlane, lavorant sui motîfs floreâi de innomenade manifature Galvani. «Un gno amì ju piturarà a man, dopo vêju tornâts a interpretâ, su la tomere dai miei scarpets», e conte Cristina Barbierato. Si podaran comprâ sul sît de aziende (www.lisfurlanis.com) tacant de Primevere. ❚

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +