Il prin fumut al San Simon

Giovanni Di Qual nol è un che si fâs preâ cuant che al è di metisi in zûc. Chest zovin grafic, curadôr di imagjine par tantis aziendis cjargnelis, al à subit dât bon acet ae sfide de jurie dal San Simon che e à viert il Premi ai fumuts e al à costruide une biele trame intal so Il Costrutôr di Trabicui, un fumut in plen stîl “steampunk” (un setôr de narative fantasientifiche, ndr) plen di riferiments al cine, in particolâr a Hugo Cabret di Martin Scorsese. Une grande sodisfazion par chest autôr che dopo il diplome di Mestri d’Art al Sello, si è laureât ancje in Dissen Industriâl al Iuav di Vignesie e in Linguaggi e Tecnologie dei Nuovi Media ae Universitât di Udin. Il lavôr al à striât i jurâts ancje se il judizi al critiche inte storie, che si pee a che dai Cramârs cjargnei, cualchi ingjenuitât e un dissen un tic masse crût. Il mecanisim naratîf dut câs al lasse cence flât di insom fin da pît. E il lavôr di Di Qual al vierzarà pardabon une strade par ducj chei zovins autôrs che un doman a volaran partecipâ al San Simon cun oparis che no sedin contis o romançs. ❚ (W. Tom.)