IL PERSONAÇ STORIC. Pauli Nicolet

Pauli Nicolet (Udin, 1368, Padue 1429), studiôs di Filosofie e di Teologjie, si fasè cognossi intes universitâts di Oxford e di Padue, dulà che tal 1408 al cjapà sù la catidre di professôr, rivant a vuadagnâsi la nomee di “doctor profundissimus”. Comentadôr di Aristotele, al declarave di jessi ideologjichementri un Averoist, afermazion che a chei timps e podeve ancje compuartâ un pericul  di eresie grandonon. Vignesie, pe sô grande culture, i domandà di jessi ambassadôr de Republiche in Polonie (1413). La sô plui grande ispirazion i ven di Vielm di Ockam, salacor il plui grant studiôs sperimentalist de Ete di Mieç: lant daûr aes sôs olmis, al à scrit un tratât di logjiche, Logica Magna, tant impuartant che la Universitât di Padue lu volè tant che libri di riferiment pai siei students. ❚
✒ Agnul Floramo