I SANTS DAL MÊS. Sants Canzi, Canzian e Canzianile

Sants Canzi, Canzian e Canzianile, martars (Ai 30 di Mai).
Canzi, Canzian e Canzianile, che une tradizion antighe ju dîs fradis, a son stâts copâts al inizi dal secul IV, sot dai imperadôrs Dioclezian e Massimian, e sepulîts «ad Aquas Gradatas». Te stesse localitât, che cumò si clame «Sant Canzian», e je stade cjatade che nol è trop une basiliche une vore antighe dedicade ai fradis Canzians e fintremai il sepulcri cui vues dai trê cuarps. La venerazion tai lôr confronts e je testemoneade dai scrits di Sant Massim di Turin (sec. V), di une preziose cassute cu lis lôr relicuiis de fin dal sec. V conservade inte citât di Grau e dal distic di Venanzi Fortunât (sec. VI) là che al racomande: «Se tu vessis di rivâ te citât di Aquilee – tu varessis di venerâ soredut i Canzians amîs dal Signôr». Za inte alte Ete di Mieç, li al jere un munistîr dedicât a di chescj martars e a Sante Marie. La venerazion pai martars Canzians si jere slargjade za te antichitât in dut il teritori de Italie setentrionâl (Lombardie), in chel dai Francs e dai Gjermanics.
Test gjavât fûr dal Messâl par furlan, di agns in spiete de aprovazion di bande de CEI (Conference Episcopâl Taliane).