IL PERSONAÇ STORIC. Josef Rosacis (Giuseppe Rosaccio)

Josef Rosacis (Giuseppe Rosaccio, Pordenon 1530 – Pordenon 1621). Laureât a Padue in filosofie e in medisine, al fo un grandissim apassionât di gjeografie, in particolâr di cartografie. Golôs di ogni cognossince, si interessarà ancje di astronomie, di storie, di matematiche e di gramatiche. Lu cjatin a Tarcint tal 1552, zovin di vincjedoi agns, là che al insegne lis arts liberâls al principi de sô cariere. Tal 1580 a Ferare al publiche une opare une vore impuartante, il “Teatri dal Cîl e de Tiere”, seguît tal 1607 di une “Gjeografie des disenûf regjons di Italie”. In plui che par une descrizion dai continents, là che al fevele di Europe, Asie, Afriche e Americhe, al fo cognossût pe realizazion di un planisferi dai plui grancj che a sedin mai stâts progjetâts. La sô opare plui biele e reste la descrizion dal viaç di Vignesie a Costantinopoli passant fûr pai Balcans: 72 taulis in acuarel là che Rosacis al conte cun peraulis e colôrs lis maraveis di ce che al à viodût dulinvie pe strade. L’unic esemplâr complet al è conservât in te sezion “Rârs” de Biblioteche de Societât Gjeografiche Taliane.
✒ Agnul Floramo