IL PERSONAÇ STORIC. Daniel Antonini

Daniel Antonini (Udin 1589 – Gardiscje dal Lusinç 1616). Matematic di grande bravure, al fo arlêf inte universitât di Bologne dal professôr P.A. Castaldi, che par chei timps al rapresentave la ponte plui avanzade inte ricercje teoriche. A Padue al podè lavorâ cun Galileo Galilei, mantignint cun lui une corispondence interessantonone di letaris e di pinsîrs che al sarès ce tant impuartant podê publicâ. E cun di fat al fo jenfri i prins a studiâ lis montagnis de Lune e il sisteme planetari di Gjove. Cuant che Galilei al fo sbeleât de Academie pes sôs scuviertis, Antonini ai scrivè: «Pussibil che a esistin oms cussì stupits che purtrop e passin par jessi dotorons? Mi ven insiemi di ridi e di inrabiâmi». Astronomi, poete, studiôs de Nature, al è muart in te vuere gardiscjane. In tal domo di Udin si pues viodi un monument a cjaval a lui dedeât.. ❚
✒ Agnul Floramo