Nassude dal 2012, la associazion Scriptorium Foroiuliense e je une des pocjis realtâts in dute Italie che e insegne in dì di vuê la antighe art dai mestris scrituriscj de Ete di Mieç.
E à sede a Ruvigne e o vin sintût Roberto Giurano, il fondadôr, par fâ il pont suntun moment une vore impuartant pe scuele di caligrafie. Di fat ca di cualchi setemane al sarà screât il “Museu de scriture e de cjarte antighe”.
Setemanis plenis chestis, Giurano?
“O disarès di sì, ma lis sodisfazions no mancjin e no mancjaran, o speri”.
Intant chê dal Pape…
“Beh, sì. Un dai doi regâi uficiâi de Regjon a Pape Francesc, cuant che ai 13 di Setembar al è vignût a Redipulie, al è stât il Vanzeli di Marc in lenghe furlane che o vin fat noaltris. E je stade une biele sodisfazion, ma o cjalìn simpri indevant”.
Fevelistu dal Museu?
“Ancje di chel, sì. O fasarìn la inaugurazion Sabide ai 8 di Novembar aes 10 a buinore e za che o soi o aprofiti par invidâ ducj i letôrs de Patrie dal Friûl a Ruvigne, tal Cjistiel di Borc di Sant Pieri”.
Cemût nassial chest progjet?
“Jo no soi furlan, ma 17 agns indaûr o soi rivât in Friûl e mi soi inamorât di chest puest. Par chest o ai simpri cirût di vivilu in plen, lavorant chi e cu la ativitât de associazion o voi indevant su cheste strade par strenzi inmò di plui il leam cul Friûl”.
In ce sens?
“Scriptorium Foroiuliense e à chê di trasmeti la art de scriture, ma no vin mai dismenteât di fâ cognossi ancje la lenghe dal Friûl: o vin fat un abecedari cul mestri Otto D’Angelo e o vin dopradis lis peraulis furlanis par insegnâ la tecniche de caligrafie. O vin trascrit a man par furlan il Vanzeli seont Marc che si diseve prime e tai cors che o fasìn ancje cun arlêfs forescj o cirìn di spiegâ ancje la particolaritât linguistiche dal Friûl”.
Parcè propit une scuele di caligrafie?
“E je une passion che e va indevant di 25 agns. O ai scomençât che o jeri un fantacin: o ai studiât 3 agns cui fraris minôrs. Dopo o ai lassât chê strade, ma no la scriture e di in chê volte no ai plui fermât di scrivi”.
Cui sono i corsiscj?
“Personis che a àn gole di cognossi chest mont, sedi par interès culturâl, ma no dome. Cualchidun, in efiets pôcs, a son rivâts ancje a fâsi une gnove profession e cumò a lavorin tant che scrituriscj, fasint pergamenis, atestâts, invîts, partecipazions, diplomis…”
Trope int frecuentie i vuestris cors?
“Cul chel che al jere partît in Setembar, o vin dât passe 140 atestâts di frecuence, ma o vin za un contat par lâ a Gurize”.
Vêso contats ancje fûr dal Friûl?
“Sigûr: Carinzie e Italie soredut, ma ancje cul rest di Europe. In ocasion de inaugurazion dal nestri Museu o presentarìn uficialmentri la colaborazion cul Museu de Cjarte di Fabriano, istituzion a nivel mondiâl riscognossude patrimoni de umanitât de Unesco”.
Cuant si podaraial visitâ il Museu?
“Lis visitis a saran par apontament e o sin daûr a programâ un calendari di proponi aes nestris scuelis”.
Cemût fasêso a puartâ indevant tant impegn?
“O sin une associazion e il nestri al è un lavôr volontari. Ma no rivaressin a fâ dut se nol fos parcè che o vin tancj sostegnidôrs privâts e cualchi colaborazion a nivel public: o vin colaborât e o colaborìn cu lis Muiniis benedetinis Olivetanis (miniaturistis), Provincie di Udin, Regjon Friûl-VJ, Comunitât Greghe Ortodosse di Reggio Calabria, La Polse di Cougnes, Scuele di Mosaic di Spilimberc, i Comuns di Ruvigne, di Sant Denêl, di Codroip, Comunitât Colinâr dal Friûl, Arlef, Istitût Ladin Furlan ‘pre Checo Placerean’, Pro Loco di Voleson e Vençon e, di ultin, il Museu di Fabriano. A ducj chescj ur va il nestri agrât di cûr”.
Par plui informazions di pues visitâ il sît www.scriptoriumforoiuliense.it e la pagjine Facebook www.facebook.com/scriptoriumforoiuliense.it. ❚
Christian Romanini