FRIÛL EUROPE. Scozie. Al vinç il ‘No’ ma no vincin dome i unioniscj

Il referendum pe indipendence de Scozie che si à davuelt ai 18 di Setembar stâts al à almancul trê vincidôrs: i unioniscj, i indipendentiscj e la democrazie.
Il sucès dai unioniscj al diven dal risultât finâl, stant che passe doi milions di lôr, ven a dì il 55,3% dai votants, a àn votât ‘No’ ae indipendence, intant che i vôts a pro de Scozie indipendente a son stâts 1.617.989, il 44,7%.
La campagne «Better Together», poiade sei dai partîts che a son al guvier a Londre – conservadôrs e liberaldemocratics – che dai laburiscj e dal piçul Border Party, e à rivât a convinci la maiorance di chei che a son lâts a votâ. La vôs dal ‘No’ si à fat simpri plui fuarte, soredut tes ultimis setemanis prin de consultazion eletorâl, cuant che di diviers scandais al saltave fûr che lis dôs posizions a vevin sù par jù chei stes consens e a jerin ancje sondaçs che a calcolavin maioritaris i sostignidôrs dal ‘Sì’. Il guvier di Londre, i trê partîts britanics unioniscj, la plui part dai media britanics e ancje la regjine Lisebete si a àn fat sintî a pro dal ‘No’ e cuintri dai «pericui» presumûts di isolament economic e politic che a saressin stâts cu la indipendence. Cun di plui, par convinci i eletôrs a pro dal ‘No’ sei il premier Cameron che i laburiscj, che a son ae oposizion, a àn prometût il passaç di diviers gnûfs podês di Londre a Edimburc.
Se si ten cont di chest aspiet, se si pense che il leader de campagne unioniste, Alistar Darling, tal so prin coment ae fin dal scrutini, al à vût dit che cumò il guvier britanic al à di mantignî l’impegn cjapât sù in cont dal trasferiment di une schirie di competencis aes autoritâts de Scozie e se si visisi che ancjemò tal 2010 il Partît nazionâl scozês (NPA-SNP) al veve fat indenant une propueste di referendum che no cjapave dentri dome la indipendence ma ben ancje nivei plui alts di autoguvier, al è clâr che ancje i sostignidôrs di une Scozie diferente – il NPA-SNP, i Verts e il Partît socialist scozês – a puedin jessi contents.
Cun di fat, denant di une partecipazion cussì alte tai seçs – passe l’84,6% – e des propuestis di devoluzion di podês e competencis fate indenant, la date dai 18 di Setembar e devente un svolt storic. Propit par vie che a àn votâts cussì in tancj e salacor ancjemò di plui parcè che il referendum al è stât fat, chê Joibe di Setembar e reste une zornade là che e à vinçût soredut la democrazie. Sucedaraial compagn ancje inaltrò in Europe? Tra Madrid e Barcelone al somee che al sofli un aiar diviers. ❚
✒ Marco Stolfo