Sfuei Mensîl Furlan Indipendent
Archivi de Patrie

AUSTRIE. No ae “autostrade eletriche” Würmlach-Samblâc

............

Il progjet dal eletrodot di alte tension Würmlach-Samblâc che al varès di passâ fûr pal tesaur naturâl dal Kronhofgraben no si realizarà, almancul pe part carinziane.
Tra Weidenburg a Kötschach-Mauthen e Samblâc, une linie eletriche a 220 kw e passarès fûr pe cussì clamade spice Kronhofgraben di cirche 1.800 metris di altece. Dutune cun comitâts ambientaliscj in Italie e in Austrie, i Verts carinzians si son batûts par impedî la »autostrade eletriche« che e jere stade previodude. Za dîs agns fa e fo impastanade la iniziative dai citadins ‘Pro Gailtal’ che e combatè cuintri la costruzion di chel implant di energjie ”inutil di un pont di viste economic, par vie che al zove dome ae massimizazion dal profit privât. Za cumò o vin trê liniis eletrichis transfrontalieris”, a disin i aversaris dal progjet.
***
Protezi la acuile reâl
Ancje dal pont di viste de conservazion de nature, il progjet al è critic parcè che al menace  – te aree alpine dal Kronhofgraben – l’ambient di vite e di cjace de acuile reâl e dal gjal di mont. Cun di plui, chi si cjatin dôs speciis di coleotars in vie di estinzion. “Ce sucedial se la acuile taliane, passât il confin, si scuintre cul grant eletrodot austriac?”, al à criticât Hannes Guggenberger de iniziative “Pro Gailtal”. La acuile reâl e il so teren di cjace a varessin di jessi protets ancje in Austrie.
Pal colegament dal cabli soterani de bande taliane ae linie aeree carinziane al bisugnarès costruî daûr Guggenberger su la mont Kronhofer Törl une grande stazion di trasferiment, cuntune paradane di trente metris di largjece e dîs metris di altece. Pilastris di beton e açâl si cjataressin subit dongje il troi turistic »Karnischer Höhenweg«, e chest al è ancje in contrast cu la Convenzion des Alps, un tratât internazionâl che al à l’obietîf di preservâ il patrimoni des Alps.
Ma ancje in Cjargne si è mote la proteste, organizade za tal an 2005, cu la formazion dal comitât ”Carnia in Movimento”. »Al è assurt che un progjet tacât in forme privade al 100% al rivi a vê l’interès public de UE », a disin.
Dopo agns di protestis, il Tribunâl aministratîf federâl austriac al à refudade in ultime istance la domande di autorizazion de societât privade taliane Alpe-Adria Energia Spa pe costruzion dal eletrodot a 220 kw. La part taliane e je stade fate buine cun normativis ambientâls. In Austrie la valutazion dal impat ambientâl e à dât, al contrari di chel talian, un esit negatîf.  “L’interès public di preservâ il caratar dal paisaç Kronhofgraben al à di jessi valutât plui alt rispiet al interès public ae costruzion dal eletrodot”: cussì, il Tribunâl aministratîf al à spiegade la reson de sô decision.
Fin al ultin dì i sostignidôrs de autostrade eletriche a crodevin di ricevi une rispueste positive. Cun di fat, ancjemò pocjis setemanis fa la costruzion e someave inevitabile. De bande taliane il progjet al veve cjapât politichementri vie libare, cuintri dutis lis protestis de popolazion locâl.
Soredut il puartevôs pe iniziative “pro Gailtal” Hannes Guggenberger al à lavorât cence padin par salvâ chest tesaur alpin. Lui e i siei compagns di lote però a laran indenant a vuardeâ il Kronhofer Törl: viodût che il progjet al à cjatât uficialmentri il »public interès« de UE, il pericul nol è ancjemò parât vie. Vâl a dî, cui che al puarte indenant la domande al à ancjemò la pussibilitât di une revision al Tribunâl aministratîf e dopo, in ultime istance, ae Cort europeane dal Lussemburc.
E ancjemò chest: i lâcs austriacs a son circondâts za a plen di edificis di ogni sorte, beton e asfalt. E cumò si metìn a cuvierzi lis monts di ciment: dome in Tirôl, une superficie di 3 chilometris cuadrâts e ven destinade ogni an a gnûfs edificis, complès turistics o implants di schîs. ❚
Janez Erat

L’EDITORIÂL / La multiculturalitât e valorize il grant e il piçul

Zuan Marc Sartôr
Belle époque. Un student di Gurize al viaze cul tren dilunc la Südbahn (la Ferade Meridionâl, di Viene a Triest). Al torne a cjase dopo agns di studi inte universitât de capitâl imperiâl. Al à frecuentât la preseade facoltât di fisiche, là che si davuelzin lis prestigjosis lezions dal professôr Jožef Štefan, il famôs fisic […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +