1. Il cjâf dal “mostri” al è chi, tra i comuns di Redipulie e S. Pieri dal Lusinç. Svicinantsi di gnot in autostrade,
lis lûs blancjis e rossis pe sigurece dal trafic aeri indi dan une imagjin spetrâl. Pardabon un biliet di visite dal Friûl orent pai turiscj che a transitin dilunc de A4. E di dì il gredei di cablis eletrics e pilons al cuvierç ancje la visuâl dal sacrari di Redipulie de autostrade. Par no fevelâ dal flum Lusinç, disfigurât in maniere ireparabile dal passaç dai cablis.
2. O sin a Vilès. L’eletrodot al procêt disfigurant lis campagnis dal Friûl Orientâl e al lenç ancje il centri comerciâl “Tiare”. Il paralelisim cu la autostrade A4 al rint ancjemò pluì sureâls lis sieltis progjetuâls che a son stadis fatis. Tant che proponût dal Comitât pe vite dal Friûl rurâl l’eletrodot al podeve jessi intierât cun comut dilunc de autostrade in ocasion de costruzion de tierce corsie.
3. Ator dai borcs rurâi di Passarian di Pavie e di S. Stiefin, in bande di une roie, a saltin fûr no dome i pilons “monostelo” dal eletrodot, ma ancje il grant profîl de centrâl eletriche logade a mieç tra il teritori dai comuns di Muçane e S. Marie la Lungje. Une feride mortâl al paisaç ben visibile ancje ai turiscj che a transitin dilunc de strade regjonâl 352 e la autostrade A23 viers Palme e Grau.
4. L’eletrodot al lenç il Foladôr di Vile Rubini a Merlane, un edifici storic costruît intal 1834 e ristruturât di pôc par deventâ sede elegante par congrès fin a 450 puescj. Un svicinament che al dimostre cun cuâl dispresi dai invistiments fats dal teritori pal disvilup turistic e vedi agjît Terna. La struture e lenç ancje Clauian, tra i borcs rurâi pluI biei di Italie, e Palme, patrimoni de umanitât Unesco.
5. Tra Listize e Basilian, si viôt benon la devastazion paisagjistiche prodote dal eletrodot di Terna. Cjalant dal alt, intune des zonis agrariis plui sioris e fertilis de regjon, il paisaç che al conte di une storie milenarie di lavôr
dai cjamps, al è cancelât e dominât de linie eletriche che in tancj lûcs e impedìs ancje la vision dal arc alpin.
6. La centrâl eletriche di Udin ovest, a cjaval dai teritoris comunâi di Basilian e Pasian di Prât, e je la code dal “mostri”. La code parcè che il fin di cheste infrastruture al è fâ afârs impuartant energjie dal forest bande l’interni de Italie. No covente aes impresis furlanis, no nus puarte nissun vantaç tarifari, al zove dome ai dividents di Terna.
