Il “Mittelfest 2015” al rinfuarce l’ûs de lenghe furlane sie te comunicazion che te propueste dai spetacui

La edizion 2015 dal Mittelfest, davuelte dai 18 ai 25 di Lui, e à rinfuarçât ancjemò di plui lis sôs lidrîs multiculturâls e plurilengâls. Chest an lu à fat dant simpri plui spazi, te comunicazion e te propueste dai events, ae lenghe furlane e a chês altris lenghis dal teritori dal Friûl: il sloven e il todesc, in gracie ae colaborazion cun l’ARLeF (Agjenzie Regjonâl pe Lenghe Furlane).
Il protocol di intese tra i doi organisims al à fat in mût che dentri dai materiâi di comunicazion dal festival, ancje tal sît internet, la lenghe furlane e à cjatât plui spazi. Il teme di chest an, la aghe, al è stât “comentât” di cualchidun dai plui impuartants poetis furlans (Federico Tavan, Pierluigi Cappello, Maurizio Mattiuzza, Stefano Moratto, Amedeo Giacomini) cuntune schirie di poesiis dentri dal sît di Mittelfest. In particolâr, al poete di Andreis, mancjât tal 2013, al è stât dedicât un totem, metût a Cividât tai lûcs dal Festival, cuntune sô poesie cetant biele (Penseir pa la fin dal an) e un so ritrat fotografic di Danilo De Marco. A son stâts previodûts ancje messaçs di salût par furlan e in chês altris lenghis de Regjon sul imprim dai spetacui.
In fin, trê i spetacui in cartelon che a an doprât la lenghe furlane. Il cjantant Loris Vescovo (Targa Tenco 2014) presint in “Colonie” (leturis, musiche e bodypainting sul svindic di Clauian dal 1945), componût in colaborazion cun Giorgio Olmeti e Valter Sivilotti cul cjançonîr di viaç “Aghe.Voda.Ujë” (Progjet speciâl Mittelfest 2015). In cartelon ancje “Su e jù”, un recital par Pier Paolo Pasolini, cun tescj par furlan, provençâl e talian par cure di Alex Grillo e Francesca Breschi. ❚
Redazion