Sul inprin e fo la cuistion dal “pont nassite”. La Zonte regjonâl e à decidût di tignî atîf chel di Monfalcon e di sierâ chel di Gurize, par vie che nol rispietave i parametris numerics minims pe sô sussistence. Il dibatiment e la polemiche su di un ospedâl a puartin a une altre cuistion e a cetancj interogatîf: cuâl isal l’avignî dal Friûl Orientâl tes sieltis de politiche regjonâl? Tiere di mieç, tirât di une bande e di chê altre, ma cence une vere progjetualitât par chel teritori, in diviers cantins? “No si pues dineâ che il Friûl Orientâl al sedi dal dut particolâr rispiet al rest dal Friûl-VJ – al conte Paolo Petiziol, president de Associazion Mittleuropa –. Al è evident da un pont di viste storic e culturâl, ancje se cheste peculiaritât e ven percepide in mût margjinâl par vie che chê provincie, vuê, e à 30 mil abitants. Cun displasê disìnsal clâr: a son come trê condominis di Milan. E po al è ancje dificil capî lis esigjencis di chest teritori: Gurize come Bolzan, come Tarvis e jere part dal imperi Austrongjaric e come tâl al à 200 agns di scuele dal oblic di plui. Dusinte agns che si fassin sintî e viodi”. Secont l’organizadôr di tantis fiestis de Mitteleuropa, cheste vicende e puarte in lûc la miopie de politiche. “A àn creât cheste problematiche che e podeve jessi risolte 20 agns za fa. No viodin prime lis robis, e i erôrs ju pain vuê. Un esempli al rive de vicende dal pont nassite: bastave no dismeti chê volte l’ospedâl che al jere dongje il confin, e vuê al sarès bastât vierzi un passaç su lis canceladis viers l’ospedâl di Nova Gorica che al jere subit di là. Tal passât si à sbaliât a no considerâ che Gurize a varès patît une diminuzion demografiche e di conseguence no si àn traghetadis lis sôs dibisugnis culturâls, linguistichis, struturâls, e ancje di viabilitât, te juste direzion”.
Segnâi di un teritori dismenteât? I problemis ju regjistre tal so piçul ancje la comunitât furlane. E denuncie Isa Dorigo, esponent de associazion dai Furlans dal Gurizan: “Nus stan sierant i sportei. Al moment al è viert dome chel de Provincie, ma in chel in comun a Gurize, che pûr al lavorave ben, no àn rinovât il contrat pe cuistion dal Compart Unic. Ma pal vêr no capìn ce che al è sucedût viodût che la Leç regjonâl 52/2014 e à sclarît che ancje il personâl de 482/99 al pues jessi rinovât fint a scjadince e se e je la cuvierte finanziarie”.
Tornant invezit ai erôrs e ae vision che si è vude sul Friûl a soreli jevât, “se o metìn insieme lis riformis che si stan pensant, e duncje la riforme Panontin e chê de Sanitât, la provincie di Gurize no ven fûr cence altri ben”, al dîs Feliciano Medeot, esponent dal mont dal associazionisim di chel toc di Friûl. “E je evident – al zonte – la spacadure di dute chê aree in dôs zonis complementârs tra di lôr: di une bande la Bisiacarie di chê altre Gurize e la diestre dal Lusinç. O vin la situazion ogjetive che il Gurizan nol à i numars che a àn chês altris provinciis, ma al è mancjât ancje il pês politic. No je cuistion di nons o di partîts, ma… daspò la fin de Vuere Frede, par esempli, si ise mai fate une politiche industriâl par chel teritori? I ise mai stât ritaiât un rûl strategjic ae citât?”. Domandis cuntune rispueste evident: la mancjance di une prospetive a medi, lunc tiermin.
La analisi di Medeot e cjape in considerazion ancjemò l’aspiet de sanitât. “Lant oltri lis barufis tra San Polo e Gurize, vincj, forsit trente agns indaûr a fevelavin di un ospedâl unic provinciâl che al veve di nassi a Gardiscje e che al jere pont di riferiment par ducj, po e je rivade la miopie de politiche e e à fermât dut. Cumò o vin une gnove riforme, si fevele di une aziende numar doi, par Gurize, Monfalcon, Tisane e Palme, aree omogjenie, al va dite, dal pont di viste socio-economic. Cence esprimi judizis in merit, viodût che al è dut ancjemò in pîts, al sarà fatôr determinant cemût che di un pont di viste operatîf, la funzion di assistence teritoriâl e sarà coordenade cun chê ospedaliere”, al siere Medeot. ❚
Oscar Puntel
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +