Lant daûr a ce che al à fat il Venit aromai cuasi un an indaûr, ancje il Friûl intes setemanis che a vignaran al varà il so referendum pe indipendence. Une iniziative che (tocje dîlu) e à tancj limits e cualchi ambiguitât, soredut dal pont di viste tecnic parcè che no si capìs ben ni cui che al podarà votâ online ni cemût. E chest par une idee di partecipazion popolâr al è za un mieç faliment, parcè che une rivendicazion di cheste fate e varès di jessi vierte a ducj, se si vûl fâ capî pardabon che si trate di une pulsion autentiche.
Dut câs, di là des considerazions sui imprescj e lis modalitâts de cuistion, a falin chei che a considerin chest apontament e cheste dibisugne pandude di une part dal popul furlan come une robe che no à nissun rilêf politic. La impuartance di un teme no sta dome tai numars de int che cheste consultazion e cjaparà dentri: il fat vêr che al è che la azion di int che doprant formis di partecipazion (virtuâls trop che si vul, ma vuê il mont al passe dut pai trois de informatiche) e pant il marum viers di chei che no garantissin il benstâ de int, il disvilup de lôr tiere e la identitât dal lôr popul no si pues dome considerâ un mateç separatist. Al è un fat che la Politiche vere, se a ’nd è ancjemò in circolazion, no varès di snobâ, ma anzit di cirî di capî par dâ rispuestis a un malstâ che al è cetant plui penç di chel che si viôt. E che al à inte pierdite de autonomie, de identitât, de fonde dal nestri jessi comunitât un dai plui grancj problemis, no dome a nivel simbolic. Ancje parcè che intant la Italie e je dute invuluçade su “le riforme istituzionali”, che a fasin vignî il mal de urtie dome a pensâ, e çampe e drete a somein dome impegnadis a tetâ aes mamelis di une Rome che però e à simpri mancul lat di dâur di supâ.
Intun Friûl dulà che lis aziendis a sierin une daûr chê altre il probleme si incuadre ancje cun altris voi. Cjalìn a cualchidune des plui grandis cuistions dai ultins mês, i scandui Cospalat e Latterie Friulane e la cuistion dai Ogm: parcè àno fat cussì pore? Parcè che i furlans a viodin menaçade la stesse lidrîs dal lôr patrimoni alimentâr che a imagjinin leât a fil dopli cul teritori. La identitât no je dome fate di cjacaris, par nô e je ancje un fatôr economic. E al è cussì par ducj i paîs di Europe dulà che popui cun caratars autonims a son sot Stâts che ju àn ocupâts secui indaûr. Par esempli Catalogne e Scozie, che di autonomie a ’nd àn fin parsore i cjavei, no ritegnin dut câs rispietade la lôr identitât de Spagne e dal Ream Unît. E i scozês a Setembar a disaran sì o no ae indipendence di Londre. Il Paîs Basc, la Corsiche, il Gales e lis Flandris ur vignaran subite daûr: ma in nissun di chescj puescj si berle, come che si è fat in Friûl, al pericul di une “balcanizazion” de Europe.
Autorevulis vôs, soredut de çampe nostrane, a àn sostignût che pandi la idee indipendentiste al puartarès il Friûl a une derive balcaniche, cun int pronte a cjapâ sù lis sclopis e a scombati par une ideologjie anacronistiche. Jo o soi apene stât in Kosovo a viodi cui miei voi ce che la balcanizazion vere e proprie e à produsût 15 agns indaûr: o ai vût maniere di fevelâ sedi cu la popolazion di Prishtine e Prizren che cui soldâts de Kfor che a son ancjemò li a garantî la sigurece di chê minorance (i serps) che îr e fruçave la identitât dai albanês. O ai capît fevelant cu la int che li, come in Bosnie, la “balcanizazion” no jere un probleme fint tant che la Jugoslavie e rapresentave ducj. Sot di Tito si saveve che i serps a comandavin ma il sisteme di podê al lassave spazi aes autonomiis teritoriâls par gjestî sul teritori dut ce che nol jere difese militâr e ordin public. Il Kosovo al jere une provincie autonome che e veve dirits linguistics e e veve otignude ancje une sô universitât.
Muart Tito, la costruzion istituzionâl de Republiche Federative Jugoslave e varès podût sorevivi, o almancul implodi cence lis tragjediis che o vin scugnût viodi dopo, dome fasint cressi il nivel di autonomie di ogni realtât che le componeve. Invezit Slobodan Milosevic al à fat propit il contrari, scliçant pardabon ogni forme di identitât che e fos diferente di chê serbe. No a câs a Prizren a considerin l’inizi de lôr fin il 1989, ven a stâi l’an che al fo proibît l’ûs uficiâl de lenghe albanese che sot di Tito e veve un status paritari a chê serbe-cravuate. Gjavâ a un popul la sô lenghe: chel al è l’inizi de balcanizazion. ❚
Walter Tomada
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +