✽✽ E je une imagjin che i nemîs dal Friûl no rivin propit a sopuartâ: chel vessil blu cun parsore la acuile patriarcjine. Cuant che le viodin che e svintule pardut intes ocasions plui variis, i antifurlans a vegnin cjapâts di atacs acûts di une alergjie degjenerative, che ju cjape cence remission ogni volte che le cjatin fissade dai obietîfs des fotocjamaris e sparniçadis sui social.
✽✽ Simpri plui dispès nol è viaç, event privât o public meritevul di considerazion che al ven doprât come testemoneance personâl di un ricognossiment identitari: e là che chest al sucêt, e je simpri la bandiere furlane a marcâlu.
✽✽ Par chest chei che a àn voie di gloti il Friûl e di fâlu disparî, a scuegnin stropâ cheste buse, e par parâ il colp a cirin di sminuî la impuartance dal so significât: lu staronzin inte dimension di un at banâl cence valôr, ma nancje chest al è avonde. Sì, parcè che il fenomen no si ferme, anzit, plui lu ridusin a alc di folcloristic, plui la mode si slargje e e devente une sorte di rît, une vere e proprie tradizion che si trasmet di pari in fi.
✽✽ Ducj i nemîs dai furlans che no si rindin a san trop che e conte cheste identificazion, e trop che e pues inlidrisâsi e difondisi in maniere capilâr, deventant une forme sigure di rapresentâsi e di identificâsi: par chest a vuelin scancelâle.
✽✽ Come che a insegnin i manuâi de controinformazion e de vuerilie psicologjiche, la miôr maniere par intosseâ cheste spontaneitât identitarie e je confondi lis aghis, rindilis turbidis, cun elements che intun prin moment a puedin someâ inocuis, ma che a son invezit velenôs come la muardude di un sarpint o l’asei di une jespe.
Par esempli si è fate une fieste grandonone a Çopule par Giada Rossi, medaie di aut tal ping pong aes resintis paralimpiadis di Parîs: une fantate nassude a San Vît, furlane doc, e ven mostrade intune fotografie “uficiâl” cu la bandiere dal Friûl. Ma no je la solite bandiere, dongje de acuile e à il logo bausâr di “Io sono FriuliVeneziaGiulia” cul tricolôr che nol jentre propit nuie. Parcè? Cualchidun al varà conseât di doprâ la foto di une atlete tant stimade e amade inte sô tiere par une operazion che no je identitarie, anzit… E je une maniere di ruvinâ un simbul cuant che no si è bogns di scancelâlu!
✽✽ Pensait aes dôs societâts di serie A che o vin, aes maiutis dal Udin e ae scuadre feminine di bale a svol dal Talmassons: l’assessôr Bini e il president Fedriga a batin cence padin marcant il rûl strategjic di chel logo dal pont di viste comerciâl. Il governadôr al va indenant: intune interviste al considere la operazion il plui grant sucès de sô aministrazion, e i crôt cussì tant che nol mancje mai di meti la felpe e la barete ancje tes ocasions uficiâls.
✽✽ Ma nol baste chest par mudâi la piel a dut un popul: insot no sin ducj “effevugins”… Ancje se dome a pronunziâ chest adietîf al ven di ridi, chescj ca mighe a schercin… ❚
