Roberto Muradore, “l’om che al cjaminave sui tocs di veri”

Roberto Muradore al è ben cognossût ai letôrs de “Patrie”. Plui voltis su lis pagjinis dal nestri gjornâl lis sôs riflessions, dispès spiçadis come i imprescj di un gue, a àn frontât i temis dal lavôr e de economie. E par chest al merete di jessi let cun grande atenzion il volum che L’Orto della Cultura al à editât metint dongje ducj i articui e i intervents che il storic sindicalist de Cisl al à burît fûr in 40 agns di ativitât inte sô organizazion. Il libri si intitule “L’uomo che camminava sui pezzi di vetro”, une metafore une vore biele par contâ il viaç dificil di un om che nol à mai sparagnât di dî la veretât in nissun contest, ancje se magari tasê i varès fat comut.
◆ La leture dal so libri nus puarte a torzeon pe storie dal mont dal lavôr in Friûl dai agns dopo dal taramot fintremai in dì di vuê. Isal lât in miôr o in piês? I problemis, nus fâs capî Muradore, no son disparîts, a son dome mudâts: la sigurece sul lavôr e la sigurece dal lavôr, par esempli, a restin i ponts che a fasin plui pensâ. E che no àn soluzions facilis, ma propit par chest no van mai molâts e a son simpri di tignî sot voli.
◆ Ce che al lasse scaturîts inte leture di chest libri e je la luciditât e la atualitât de analisi che e vignive puartade indevant za dai agns Otante di Roberto che, ancje se al jere protagonist di chês vicendis, al à simpri cjatade la maniere di cjalâlis in maniere obietive, rivant a proponi e concretizâ esperiencis inovativis come chê dai Pats Teritoriâi. La passion e la coerence a son lis coordenadis dal resonament che al ven puartât indevant in ducj i articui, che a partissin di un osservatori concret: chel che al ven de fabriche, dal stabiliment, des mans dai operaris furlans, che a fasin simpri mancul siopars ma no àn pierdude la voie e la bisugne di lamentâsi. Ancje parcè che la dignitât dal lavôr e sta lant in mancul.
◆ Se la cundizion dai dipendents no je cjalade in maniere retoriche, ancje ai parons Muradore no ur sparagne nuie. No si contente de version uficiâl, des “velinis” de stampe, des declarazions de politiche: ancje parcè che lui al è jentrât ae Safau par sielte, dopo 5 agns di Stellini, e in chel ambient al à simpri cjatât la fuarce di metisi a disposizion di lotis e mediazions a pro dai coleghis. E ancje a pro di une idee di Friûl che e je une vore dongje a chê che “La Patrie” e à simpri sostignude, ven a stâi chê di une tiere buine di proviodi di bessole a cuasi dut ce che i covente. E soredut, buine di puartâ indevant la culture dal lavôr che e à fat cognossi i nestris paris ator par dut il mont. ❚