I 100 agns di Nereo Perini, pionîr de didatiche dal furlan

Une vite pal studi e pe valorizazion de lenghe furlane, intune suaze plurilengâl, in relazion cun dutis lis fevelis dal teritori e dal mont. Ai 2 di Dicembar al finìs 100 agns il professôr Nereo Perini, furlan di Dartigne, che al è stât il prin docent a insegnâ Didatiche des Lenghis Modernis in Italie. E i siei contribûts su la maniere plui valide par insegnâ il furlan a son ancjemò une fonde che no si pues fâ di mancul di cognossi.
◆ La sô vite e je stade pardabon plene di esperiencis. Iscrit a Lenghis e Leteraturis Forestis a Ca’ Foscari, al fo puartât vie de vuere fintremai in Russie, dulà che al à rivât a salvâsi la vite a Nikolajewka e Arnautovo e, ferît e fat presonîr dai todescs, al à ancje meretade la Medaie di Arint al valôr. Laureât in Francês cuntune tesi su Tocqueville, al veve sielzude la cariere inte scuele e al è stât ancje preside dal Istitût Zanon, fin cuant che a Udin si vierzè la sucursâl de Facoltât di Lenghis de Universitât di Triest, e lui al fo prin assistent e po titolâr dal 1971-72 dal prin insegnament in Italie di Didatiche des Lenghis Modernis. Dal 1974 al deventà diretôr dal Istitût di Pedagogjie e Didatiche des Lenghis Modernis, e in chel interval al à fondât e diret il CLAV (Centri Linguistic Audiovisîfs), ideant il CIRD (Centri interdipartimentâl di Ricercje Didatiche), e sburtant pe creazion dal CIP (Centri Internazionâl pal Plurilinguisim) pe Universitât dal Friûl. Inte sô ativitât al à colaborât aes primis sperimentazions di educazion bilengâl furlan-talian e sloven-talian tes scuelis de infanzie de provincie di Udin, che a forin puartadis indevant di Silvana Schiavi Fachin.
◆ Intai siei percors di ricercje, al à colaborât cul British Council, cu lis Societâts talianis di Glotologjie e Linguistiche, cu la Société de Linguistique de Paris e cul CNR: al à podût tamesâ temis di linguistiche aplicade, di glotodidatiche e di formazion dai insegnants, organizant e animant cors e cunvignis in Italie e tal forest. Cun di plui, inte part finâl de sô cariere e ancje dopo dal so pensionament, al è lât indevant a lavorâ pal e sul furlan cu la Universitât di Toronto. I materiâi realizâts pai students furlans-canadês a son une vore interessants ma no son stâts mai publicâts: e un biel regâl pai siei 100 agns al sarès chel di editâju par metiju a disposizion de comunitât dai studiôs. La “Patrie” e ringracie il professôr Perini e no dismentee il so grant lavôr a pro de lenghe furlane. Auguris! ❚