Sfuei Mensîl Furlan Indipendent
Archivi de Patrie

«Il gno sium? un sindic cu la fasse zale e blu». Vie pal mês lis gnovis elezions dal Parlament Furlan. La interviste al president in jessude Gianni Sartor

............

Chei de associazion Parlament Furlan ancje chest an a fasin il referendum digjitâl pe indipendence e la votazion pal “parlament furlan”. Lis gnovis elezions a son tacadis il prin di Otubar par finî ai 31. I risultâts a rivaran intant che La Patrie dal Friûl e sarà in stampe, e o ‘nt darìn cont sul numar che al ven. Intant o vin sintût il president in jessude di chest ideâl Parlament dal Friûl, Gianni Sartor, nomenât fra i 11 elets dal an passât. Di Davian, comerciant, 53 agns, cuntun passât socialist (tal consei comunâl di Çopule tai prins agns 90), al è stât candidât dal MAF-Moviment Autonomist Furlan di Grillo-Strassoldo pes provinciâls di Pordenon e par UAR-Un’Altra Regione di Bandelli a lis ultimis regjonâls.
–––
Cemût mai aial decidût di presentâsi l’an passât a lis elezions dal Parlament?
Jo o soi un dai fondadôrs de associazion. O soi stât cetant deludût des esperiencis politichis di zovin e mi soi rindût cont che se no si fâs une robe fûr dai partîts talians, il Friûl nol otignarà mai nuie. O vin di formâ une cussience politiche come la Catalogne, par fâ un esempli, e duncje cun altris o vin metude sù cheste associazion e imbastît il referendum: al è un progjet che al cjale lontan.
–––
Une particolaritât de associazion Parlament Furlan e je che a son dentri in tancj de Provincie di Pordenon…
Di chel o soi une vore braurôs! I prins trê tes votazions, jo, la Pivetto e Cesarin, o sin dal Friûl Ocidentâl. E nol è parcè che tancj fondadôrs a son di chenti, par esempli lis riunions lis fasìn par comoditât a Udin che al è plui centrâl e comut par ducj. Cheste e je une dimostrazion che al è vêr chel sondaç fat des Provinciis, publicât ancje di voaltris, li che si viôt che in provincie di Pordenon si sintin furlan te stesse percentuâl de provincie di Udin, al di là des balis che nus contin i media.
–––
In struc, ce vêso fat duncje chest an?
Prin di dut, tantis conferencis par fâ cressi chê cussience di apartignince che o disevi prime, e di fat di 11, aes elezions chest an si presentìn in 30. Po dopo ancje robis plui pratichis, tant che imbastî une onlus che si clame “Furlans pal Friûl” cun chê di dâ jutori economic ai furlans che a àn bisugne. Par esempli, o vin judât tancj vecjos rispiet ai tais te sanitât volûts de Serracchiani, li che a àn gjavade la dotazion di panzits pai vielis di 6 a 3. Al pues someâ un argoment di pôc cont, ma une confezion e coste 35 euros.
–––
Novitâts pal futûr?
O vin fat di resint une riunion li che o vin decidût un cambi di strategjie rispiet ae prime intenzion, ven a stâi di no partecipâ a elezions: o vin decidût che, se si rive, o darìn la poie a candidâts furlaniscj tes aministrativis. Il gno sium al è di fâ lâ sù un sindic nestri, e che si presenti aes ocasions uficiâls cu la fasse blu cu la acuile impen di chê tricolôr. Chest al fasarès scjas e al movarès lis cussiencis, dant visibilitât ae cuistion furlane.
–––
Lui tornaraial a presentâsi aes elezions, e si candidaraial ancjemò tant che president dal Parlament?
Mi presenti aes elezions, ma no ai intenzion di tornâ a fâ il president parcè che o pensi che al varès di jessi un zovin, che a chel i darai par prin une man. Ancje l’an passât o varès vût miôr che al fos cussì, ma mi àn dât a mi l’impegn; mi restarà la sodisfazion di jessi stât il prin. No soi tacât ae poltrone, insume (al rît, n.d.r.). ❚
Dree Venier

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +