Sfuei Mensîl Furlan Indipendent
Archivi de Patrie

Il cjaliâr di Tumieç. Un mistîr vecjo par un fantat zovin

............

“Se jo o ves di maridâmi un cjaliâr no cjolarès, lui al è bon di bati suelis e ancje me mi batarès…”
Cussì a cjantavin lis zovinis une volte, ma in dì di vuê al è dificil fintremai cjatâ un cjaliâr: un dai tancj vecjos mistîrs che al va disparint. Vuê, timp dal dopre e bute, se lis scarpis si rompin si lis bute vie e cetant di râr si puartin a comedâ. La inovazion tecnologjiche e il progrès a àn puartât a creâ, par fâ bêçs, une societât che e dopre e e bute vie la robe cence stâ masse a pensâi parsore.
Spes al sucêt, par esempli, di rompi une part di un imprest? di cjase e cuant che si lu puarte a comedâ nus disin che no vâl la pene spindi tancj bêçs, ancje parcè che cun chê stesse spese si pues comprânt un gnûf. E cussì, si din di fâ a jemplâ i bidons des scovacis.
Une volte, e no covente lâ indaûr di tancj agns, i nestris nonos a tignivin di cont dut e a butavin vie dome ce che no si podeve plui doprâ.
IL TIMP SI FERME_A Tumieç, sot i puartis te centrâl vie Rome, al n. 38/A, al semee che il timp si sedi fermât: passant si pues nulî l’odôr di corean e di patine. Culì, di cirche un an Valentino Felice, un zovin di 24 agns di Tierç, al à vierte la sô buteghe di cjaliâr. Valentino, dopo i studis superiôrs, al à lavorât in fabriche ma il lavôr ripetitîf nol jere par lui, e cun di plui al jere di un pôc che i balinave la idee di podê une dì meti sù alc di bessôl.
E cussì, une dì so pari, zirant par internet, i à dit che a Foggia al jere un cors par imparâ il mistîr di cjaliâr: Valentino no si è tirât indaûr e al è lât a fâ esperience intune buteghe. Al è stât un mês lunc, oris e oris di lavôr par fâ jentrâ l’inzen.
AL COVENTE TANT IMPEGN_Dut al è coventât par vierzi la buteghe e par tornâ a fâ vivi un vecjo mistîr. A Valentino no i mancje la manualitât e tante voie di fâ. Lui al comede pôc o trop dut, ancje cernieris dai russacs. E di pôc, tal so negozi si puedin cjatâ cinturis, tacuins, puarteclâfs e dut ce che al covente pes scarpis.
“E je dure – al dîs – fin cumò o soi rivât dome a paregjâ i conts. A son tantis lis spesis di frontâ ogni mês: afit, mutui che o ai fat par comprâ i machinaris… Insome, no mi reste cuasi nuie par me. Spes mi capite di lavorâ plui di 8 oris in dì e di stâ sù fin a straoris te buteghe. Ma o soi content di chest lavôr: mi sta dant tantis sodisfazions. Mi auguri che il gno impegn al vegni, timp o tart, ripaiât.”
Il lavôr che al fâs Valentino si lu pues seguî dì par dì su pe pagjine facebook https://www.facebook.com/ilcalzolaiotolmezzo. Sì, parcè che Valentino al fâs un vecjo mistîr ma al è un zovin al pas cui timps. Nol è di grandis peraulis ma al è un grant lavoradôr: insome, dutis carateristichis di un cjargnel DOC!
E dopo a disin che in Cjargne no ‘nd è zovins brâfs e coragjôs?
Direzion mail: valentino791(chiosule)hotmail.it ❚
Marta Vezzi

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +