Sfuei Mensîl Furlan Indipendent
Archivi de Patrie

Il furlan si difint slargiantsi pardut: la strategjie gjenerâl de ARLeF

............

Martars ai 30 di Lui,  vie pe sô ultime sentade il Consei di Aministrazion de Agjenzie al à fat bon la propueste di Plan Gjenerâl di Politiche linguistiche elaborade dal so Comitât tecnic sientific, rinovât tal mês di Setembar dal 2012 e che al restarà in cjare fin al 2015. Invezit il Cda al è in spiete dal rignuviment.
Il document al trace lis liniis dal plan di politiche linguistiche che la Regjon che e varà di aprovâlu cuntun decret de Presidente de Regjon, sintude la comission consiliâr competente, e po al sarà publicât sul Boletin uficiâl de Regjon. Lis aministrazions publichis a varan duncje di atignîsi a chestis regulis.
Ve chi setôr par setôr, lis gnovis di plui interès, seont un comunicât de stesse ARLeF.
“PATENTIN”
La definizion corete e je “certificazion linguistiche”: une verifiche e relative atestazion des competencis linguistichis che un al à. Al esist un cuadri di riferiment european che al valute par nivei (che tal nestri câs a saran 4) la competence intune determinade lenghe. Al sarà viert par ducj chei che a àn plui di 16 agns.
AMINISTRAZION PUBLICHE: AUTOVIE VENETE E SCRIVARÀ PAR FURLAN
In plui di incressi l’ûs public dal furlan – cun comunicazion istituzionâl bilengâl, ancje dal sît internet, traduzion dai ats, servizi di interpretis, sportei linguistics, afission di insegnis e indicazions di publiche utilitât – la Regjon e varà di garantî che la cartelonistiche stradâl presinte tal teritori delimitât di competence di FVG Strade e di Autovie Venete e vedi i toponims ancje in lenghe furlane. I stes obietîfs a son domandâts ai ents locâi e aes Aziendis sanitariis che, par ricevi finanziaments di bande de Regjon, si impegnin a fâ bon un lôr Plan speciâl di politiche linguistiche (PSPL) cul jutori de ARLeF.
FORMAZION: DOME INSEGNANTS “CERTIFICÂTS”
Il Plan al individue te formazion dal docent il fat decisîf par otignî un bon nivel di cualitât tal insegnament de lenghe furlane.
In rivuart ae atestazion des competencis di caratar didatic, la ARLeF e stabilirà chês di fonde, cul coinvolziment de Universitât di Udin. Lis competencis linguistichis e didatichis a saran lis cundizions par jentrâ tal Elenc regjonâl dai insegnants, fat che vuê nol è fondât su di un titul ciert e compagn par ducj.
MIEÇS DI COMUNICAZION: DENTRI DI CUATRI AGNS UN TG RAI CUOTIDIAN
Un notiziari televisîf cuotidian in RAI. Al è chest il travuart plui ambiziôs che il Plan al vûl viodi atuât a cuatri agns de jentrade in vore. Di tancj agns si spere di viodi atuade une situazion che e je realtât consolidade par altris minorancis linguistichis prudeladis de 482/99.
In spiete che la Regjon e concretizi la tratative cul Stât par inserî chescj obietîfs te convenzion Ministeri/Concessionari dal servizi public radiotelevisîf, cun finanziaments statâi, il Plan al travuarde a doi agns altris risultâts: un notiziari radiofonic cuotidian e l’ûs di sot titulazions par furlan a supuart dai notiziariis televisîfs tal  servizi public radiotelevisîf (in forme di strisse di gnovis che a corin sot vie pal telegjornâl o tant che somari dai titui) par favorî la progressive alfabetizazion dal telespetatôr. Te cjarte stampade dentri di cinc agns al ven proviodût un cuotidian di plante fûr par furlan.
INTERNET: STANDARD PAR REALIZÂ SÎTS WEB E APPS
Tal Plan e je une grande part su lis gnovis tecnologjiis che a son consideradis tant che strument decisîf par pandi la lenghe massime jenfri i zovins: il document al da indicazions par realizâ sîts web e aplicatîfs par smartphone, IPad, e vie indevant…
ASSOCIAZIONS: IN PRO LOCO SI FEVELE E SI SCRÎF FURLAN
Lis aministrazions locâls, cui Plans speciâi di politiche linguistiche, a judaran lis associazions sul lôr teritori (centris estîfs, pro loco e vie indevant…) par fâ jentrâ planc a planc la lenghe furlane tes lôr ativitâts.
I Ents a cjapitul, invezit, a varan di fâ plui di presse: dentri di doi agns a varan di realizâ almancul il 70 par cent de lôr ativitât in lenghe furlane o, mal che al ledi, in version bilengâl.
SOCIALIZAZION DE IDENTITÂT: I VOLONTARIS DE  MARILENGHE
Dal dut gnove la ativitât di “Volontariât pe lenghe furlane” che e vignarà inviade par cure de ARLeF a un an de jentrade in vore dal Plan cul obietîf di meti in contat personis che a vuelin imparâ a fevelâ il furlan o miorâ la lôr cognossince cun cui che lu fevele za benon e che al vûl fâ il volontari de “conversazion” dibant. Compit de Agjenzie al sarà chel di facilitâ, cu la costituzion di un regjistri, l’incuintri jenfri dôs personis che po a decidaran in autonomie cuant incuintrâsi e cemût davuelzi il program.
CUMIERÇ E IMPRENDITORIE: IL FURLAN AL CONVEN
Il Plan al individue tant che strategjics i setôrs dal cumierç e de imprenditorie pe politiche linguistiche e par chest al promôf cun fonts regjonâi, par mieç de ARLeF, la realizazion di une campagne di coinvolziment des categoriis economichis, massime chês comerciâls, dai esercizis publics e de ristorazion. La campagne e spiegarà i vantaçs dal ûs de lenghe furlane tal rapuart jenfri esercent e client e de sô presince tes campagnis publicitariis. ❚
✒ Redazion

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +