Sfuei Mensîl Furlan Indipendent
Archivi de Patrie

AFDS, cuant che la solidarietât a fevele par furlan

............

In timps dificii di crisi tant che chei di vuê, la solidarietât e je palesementri ancjemò plui impuartante, tant pal contribût pratic di front a tantis situazions di dificoltât, che par judâ a mantignî un tic di sperance e di fidance intune societât cun ancjemò un pocje di umanitât.
Solidarietât (si spere) tes piçulis robis di ogni dì tra persone e persone, ma naturalmentri ancje solidarietât tal sens di savê dedicâ un tic di timp e cualchi piçul sacrifici par chei, ancje cence un non, che si cjatin intun moment di bisugne. Chel lavôr pasionât, che nol domande nuie indaûr, che al caraterize la ativitât di tantis associazions che si spindin par diferentis problematichis, che a sedin bestiis maltratadis, fruts o fameis in dificoltât, personis cun cualchi disabilitât o dâ une man a une sanitât publiche masse dispès “çuete”.
Valôrs – chei de gjenerose e disinteressade disponibilitât a judâ il prossim, de diligjence di spindi il propit timp par alc di util, dal sintîsi part responsabile di une comunitât cence tirâsi indaûr cuant che al covente – che nus plâs pensâ che sedin alc inlidrisât tal profont de culture furlane, tradizionalmetri simpri in prime file cuant che al è di frontâ cualchi disastri, ancjemò di plui dopo de scopule dal taramot dal ’76. Fat testimoniât ancje de statistiche, che e ripuarte il Friûl tra lis regjons plui vivarosis sul front dal cussì clamât “tierç setôr”, il mont dal volontariât che tant al contribuìs a tignî adun chest biât incasinât stât.

Renzo Peressoni president de AFDS intun dissen di Giovanni Di Lena
Renzo Peressoni president de AFDS intun dissen di Giovanni Di Lena

Un bon esempli che al somee confermâ cheste mirabile carateristiche de int furlane nus è vignût proprit cheste Istât, in ocasion de Assemblee de Associazion Furlane Donadôrs di Sanc (AFDS), une des realtât che plui si spint tal nestri teritori par une robe cussì impuartante tant che meti a disposizion dai ospedâi une des pocjis robis che la farmaceutiche no rive a produsi, il sanc e i siei derivâts. In chê ocasion, di fat, il president Renzo Peressoni – tal so discors di fin dal secont mandât – al à rimarcât il fat di vê constatât, te sô esperience, trop che vê “Furlane” par seconde peraule dal non de associazion al vedi contribuît un grum al consolidament di cheste realtât, tant che al fos une sorte di certificât di garanzie de serietât dal so operât.
Te sô relazion – un interessant belanç che al à evidenziât un grum di robis plui che positivis, ma cualchi preocupazion sul cemût movisi pal avignî de ativitât – Peressoni al à segnalât il fat che “la AFDS e je di 55 agns il spieli de societât furlane, un dai fatôrs de sô identitât, e duncje no pues clamâsi fûr de societât civîl, no si pues permeti di scjadi, di flapîsi, di deviâ”. Un impegn – al à ribadît – che nol à di intindisi dome tal sempliç moment dal prelêf, ma che al à simpri di tignî iniments i siei “obietîfs di propagande, clamade a donâ, prevenzion e educazion sanitarie”.
E la “furlanitât” de AFDS si intuìs ancje dal fat che i siei potenziâi problemis a son compagns di chei de culture furlane, ven a dî la fondamentâl dibisugne di coinvolzi simpri di plui i zovins (“parcè tai zovins no si investissin dome risorsis, ma soredut sperancis”), e che di rivendicâ no dome “dignitât, ma ancje impuartance” par une realtât che e somee di periferiche (ma biele vivarose) di front a referents talians, dispès masse distrats par tignî avonde di cont il contribût che lis realtâts sul teritori a son buinis di presentâ, in tiermins di propuestis e esempli.
Dut câs – tai 55 agns de sô storie – la associazion furlane e à savût cressi in maniere mirabile, no dome tai numars dai donadôrs, ma ancje te cualitât dal lavôr, tant sul front de divulgazion che te capacitât di disvilupâ un don plui articolât (no dome sanc, ma simpri plui preseâts plasme e piastrinis), al pont di rivâ ta l’an record dal 2010 al grant biel numar di 48.000 donazions. E ancje se chel risultât nol è stât plui replicât (“par une logjiche naturâl, cun di une bande il numar de popolazion in provincie e di chê altre la mancjance di particolârs emergjencis… e une popolazion mediementri simpri plui anziane”, al spieghe Peressoni), la voie de Associazion di tirasî sù di maniis e metisi a lavorâ cun ancjemò plui snait (ancje in chel une anime un grum “furlane”…) e somee simpri plui determinade, e e fâs ben sperâ di podê ancjemò contâ a lunc sul so nobil e preziôs sfuarç pal ben di duçj.
Parcè che nol fâs mai mâl impensâsi che a duçj – prime o dopo – al podarès capitâ di cjatâsi a vê dibisugne di sanc, e guai in chel dì a no visâsi di chei che si son spindûts par agns par garantî che l’ospedâl lu vedi pront e a disposizion. Che se jessi Furlans a vûl dî par sigûr jessi gjenerôs, viodìn di no dismenteâ mai ancje il dovê de ricognossince. Provant a fâ – parcè no – ancje la proprie piçule part, cuntune o dôs donazions vie pal an…❚
Margherita Timeus

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +