Il storic american ae scuvierte dai abûs su lis frutis inte Vignesie di Casanova

Larry Wolff (1957) al è un professôr che al insegne Storie de Europe Orientâl te Universitât di Stanford. Si è formât inte Universitât di Harvard studiant la storie de Ucraine e de Polonie, e par chest al à vût di perfezionâ la sô cognossince di dutis lis regjons europeanis là che si fevele une lenghe slave. Si è ocupât de monarchie asburgjiche tant che di un mont là che lis culturis plui diferentis a podevin esprimisi intun contest gjeografic cetant dilatât, ma intune reciproche ricjece fondade sul rispiet e su la pluralitât. Cul timp al à aprofondide la ete dal ‘700 e si interesse des problematichis peadis ae infanzie inte suaze de storie moderne. Il so cjamp di ricercje lu à puartât a investigâ lis intersezions tra Orient e Ocident, in particolâr sul plan de economie e intal cjamp des tematichis peadis ae societât, ae antropologjie e ae storie de mentalitât. I rapuarts che il Vatican al à inmaneât cu la Polonie, i leams di Vignesie cu lis regjons dal Adriatic, dai Slâfs, Viene e la Galizie a son stâts ponts di aprofondiment dal so interès sientific, simpri orientât su lis minorancis, sui popui e su lis lenghis minorizadis di Europe. Une sô idee fuarte e je che l’Est Europe al sedi stât “inventât” tant che une proiezion culturâl tacant dal secul XVIII par volontât di filosofs e di viazadôrs iluminiscj che a jerin convints di une diference profonde tra lis dôs animis europeanis (ven a stâi chê Orientâl e chê Ocidentâl) che si frontavin une cuintri chê altre come doi modei diferents di societât, di economie e di culture. La sô ricercje plui interessante si oriente intal investigâ la idee che Vignesie si jere fate de regjon Dalmatine e cemût che la Dominante e à savût sfrutâle pal so interès. La intuizion plui grande però e je chê di esplorâ la ete de infanzie tignint cont de deviance e de violence che, magari cussì no, inte societât umane si fâs cuintri des categoriis plui debilis, in particolâr i fruts e lis frutis, dispès doprâts tant che imprescj par dâ sodisfazion aes esigjencis dai grancj. In chest contest al nas “Paolina’s Innocence. Child Abuse in Casanova’s Venice” (La inocence di Paolina. La violence suntune frute inte Vignesie di Casanova), dal 2012: un studi une vore impuartant che al cjape dentri plui di 300 pagjinis di archivi, anticipât di une monografie une vore interessante, “Postcards from the End of the World” (Cartulinis de fin dal Mont), là che al va a studiâ la violence cuintri dai minôrs inte Viene di Sigmund Freud. In timps plui resints, al à ancje frontade la cuistion de Turchie vie pal secul XVIII, cu lis relazions politichis ma ancje culturâls che l’Imperi dai Otomans al à tignût cul rest de Europe, soredut cun chê Orientâl. Cussì e je nassude la opare “The Singing Turk” (Il Turc che al cjante), edite tal 2016. Wolff al è un autôr che al va daûr di olmis une vore diferentis. In plui che preseât om di sience, al è ancje autôr di oparis musicâls e teatrâls. Di fat, tal 2019 si è ocupât ancje de figure dal compositôr Erich Wolfgang Korngold, scjampât intai Stâts Unîts de Austrie naziste intal 1938, e che intal stes an al meretarà l’Oscar pes musichis dal film “The Adventures of Robin Hood”, cun Errol Flynn e Olivia de Havilland. ❚